Цаг уур, орчны шинжилгээний газраас ирэх хоногуудын цаг агаарын төлөв байдлыг танилцууллаа. Өнөө шөнө болон маргааш зарим нутгаар бага зэргийн бороо орж, уулархаг нутаг болон голуудын хөндийгөөр шөнөдөө хөрсөн дээр цочир хүйтрэхийг анхааруулж байна.
Бүс нутгуудын хур тунадас ба агаарын температур
Энэ сарын 8-наас 9-нд шилжих шөнө Булган, Төв аймгийн зарим, Эрдэнэт, Дарханы ихэнх, Сэлэнгийн өмнөд сумдын нутгаар хур тунадас орох бол есдүгээр сарын 9-ний өдөр Дорноговь, Хэнтий, Дорнодын зарим нутгаар 0.0-1.4 мм бага зэргийн бороо, Сүхбаатар аймгийн ихэнх сумдын нутгаар 0.1-6.0 мм бороо орно. Бусад нутгаар хур тунадас орохгүй.
Агаарын температурын хувьд шөнөдөө Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс, Орхон, Туул, Тэрэлж, Хэрлэн голын хөндийгөөр -5-аас 0 градус хүйтэн байна. Харин Эхийн голын Баянбүрд орчмоор +11-ээс +16 градус, Их нууруудын хотгор, говийн бүсийн өмнөд хэсгээр +7-гоос +12 градус, бусад нутгаар +1-ээс +6 градус дулаан байна.
Өдөртөө Алтай, Хангай, Хөвсгөл, Хэнтийн уулархаг нутаг, Дорнод-Дарьгангын тал нутгаар +14-өөс +19 градус, Их нууруудын хотгор болон Эхийн голын Баянбүрд орчмоор +23-аас +28 градус, бусад нутгаар +19-өөс +24 градус дулаан байх төлөвтэй байна.
Нийслэл болон орчмын бүсийн төлөв
Улаанбаатар хот орчмоор өнөө шөнө үүлшинэ, өдөртөө үүл багасах ба бороо орохгүй. Салхи баруун хойноос секундэд 4-9 метр хурдтай салхилна. Агаарын температур шөнөдөө +3-аас +5 градус дулаан байх ба Туул голын хөндий дагуу 0-ээс -2 градус хүйтэрч, хөрсөн дээр цочир хүйтэрнэ. Өдөртөө +15-аас +17 градус дулаан байна.
Багануур орчмоор шөнөдөө үүлшиж, өдөртөө үүл багасах бөгөөд хур тунадас орохгүй. Шөнөдөө +2-оос +4 градус, өдөртөө +15-аас +17 градус дулаан байна. Тэрэлж орчмоор шөнөдөө -1-ээс -3 градус хүйтэн, өдөртөө +14-өөс +16 градус дулаан байх ба бороо орохгүй.
