Монгол Улсын Ерөнхий сайд Н.Учрал Оросын Холбооны Улсын Владивосток хотноо болж буй Дорнын эдийн засгийн XI чуулга уулзалтын үеэр /2026.09.03/ ОХУ-ын Эрчим хүчний сайд С.Е.Цивилёвтэй уулзаж, түлш шатахууны нийлүүлэлтийг тогтвортой хадгалах болон эрчим хүчний салбарын хамтын ажиллагааны талаар санал хэлэлцлээ.
Түлш, шатахууны нийлүүлэлт ба хамтарсан ажлын хэсэг
ОХУ-ын Засгийн газраас энэ оны дөрөвдүгээр сард нефтийн бүтээгдэхүүний гадаад экспортод хориг тогтоосон ч хоёр улсын найрсаг харилцаа, эрх зүйн тохиролцооны хүрээнд Монгол Улсын хангамжийг тогтвортой хадгалж ирснийг ОХУ-ын Эрчим хүчний сайд С.Е.Цивилёв тэмдэглэв. Тэрбээр цаашид ч Засгийн газар хоорондын хэлэлцээрийн дагуу Монгол Улсын шатахууны хэрэгцээг тасралтгүй, найдвартай хангахад онцгой анхаарч ажиллахаа мэдэгдсэн юм. Мөн “Роснефть” болон “Газпром нөөц” компаниудын удирдлагууд Засгийн газрынхаа шийдвэрийн дагуу шатахууныг тогтвортой нийлүүлнэ гэдгээ баталгаажуулав.
Уулзалтын үеэр С.Е.Цивилёв сайд Улаанбаатар хотын агаарын бохирдлыг бууруулах, цэвэр эрчим хүчний эх үүсвэрийг нэвтрүүлэх асуудлыг судлах хамтарсан ажлын хэсэг байгуулах саналыг тавьжээ.
ДЦС-3-ын өргөтгөл ба байгалийн хийн хоолойн төсөл
Түлш, эрчим хүчний салбарын стратегийн бусад төслүүдийн талаар талууд дараах асуудлуудаар санал нэгдлээ:
- “ДЦС-3”-ын өргөтгөл: Өргөтгөл, шинэчлэлийн төслийн зураг төсөл боловсруулах Засгийн газар хоорондын хэлэлцээр хүчин төгөлдөр болсныг тэмдэглэж, “ДЦС-3” ТӨХК болон “Интер РАО Экспорт” компанийн хоорондын гэрээний нөхцөл, өртөг, төлбөр тооцоог ойрын хугацаанд эцэслэн тохиролцохоор болов.
- Байгалийн хийн хоолой: Монгол Улсын нутаг дэвсгэрээр дамжин өнгөрөх байгалийн хий дамжуулах хоолойн төслийн дараагийн шатны гэрээ хэлэлцээг эрчимжүүлэхэд Оросын тал үргэлжлүүлэн дэмжлэг үзүүлэх хүсэлтийг Ерөнхий сайд Н.Учрал уламжиллаа.
Дипломат харилцаа тогтоосны 105 жилийн ой тохиож буй энэ онд талууд Иж бүрэн стратегийн түншлэлийн харилцааг улам бэхжүүлж, шатахуун нийлүүлэлтийн урт хугацааны эрсдэлийг бууруулах механизмыг хамтран хэрэгжүүлэхээр тохиролцов.
