АНУ-д “Мисс США” гоо бүсгүйн тэмцээний 75 дахь удаагийн финал болж, Виржиниа мужийг төлөөлсөн 31 настай Жастус Келли ялагч боллоо. Түүний ялалт тус тэмцээний түүхэнд онцгой үйл явдал болов. Учир нь анх удаа эх хүн, мөн гэрлэсэн эмэгтэй “Мисс США” титмийг хүртсэн байна.
Финал 8-р сарын 27-нд болсон бөгөөд гол титмийн төлөө АНУ-ын 50 муж болон Колумбийн тойргийг төлөөлсөн оролцогчид өрсөлджээ. Ойн тэмцээнийг зохион байгуулагчид “75 years of icons” буюу “75 жилийн бэлгэ тэмдэг болсон эмэгтэйчүүд” хэмээн нэрлэж, олон арван жилийн турш “Мисс США” брэндийг төлөөлсөн бүсгүйчүүдэд зориулсан байна.
Дүрэм өөрчлөгдсөнөөр шинэ түүх бичигдэв
Шинэ “Мисс США” болсон Жастус Келли өмнө нь “Мисс Виржиниа США 2026” тэмцээнд Виржиниа мужийг төлөөлж байжээ. Түүнд титмийг өнгөрсөн жилийн ялагч Одри Эккерт гардуулсан байна.
Келлигийн ялалт 2023 онд тэмцээний дүрэмд орсон өөрчлөлттэй холбоотойгоор илүү онцгой болсон. Тухайн үед зохион байгуулагчид оролцогчдын дээд насны хязгаарыг цуцалж, хүүхэдтэй эмэгтэйчүүдийг тэмцээнд оролцохыг зөвшөөрсөн юм.
Ингэснээр Келли “Мисс США”-гийн түүхэнд титэм хүртсэн анхны ээж болсон төдийгүй анхны гэрлэсэн ялагч болжээ. Түүний ялалт сүүлийн жилүүдэд гоо бүсгүйн тэмцээнүүд хэрхэн өөрчлөгдөж байгааг харуулж байна. Өмнө нь ийм тэмцээнүүд оролцогчдын нас, хувийн амьдралд илүү хатуу шаардлага тавьдаг байсан бол одоо амьдралын өөр өөр туршлагатай эмэгтэйчүүдэд илүү нээлттэй болохыг зорьж байна.
Ялагч 685 мянган доллараас дээш үнэлгээтэй шагнал авна
Жастус Келли “Мисс США” титмийн хамт нийт 685 мянган ам.доллараас давсан үнэлгээтэй шагналын багц авах юм. Үүнд 150 мянган ам.долларын жилийн орлого, Range Rover автомашин, Майамигийн тансаг орон сууцны цогцолборт нэг жилийн түрээс, Westgate Vacation Home Club-ийн гишүүнчлэл багтжээ.
Мөн Miss Universe тэмцээнд оролцоход зориулсан 30 мянган ам.долларын үнэлгээтэй хувцасны багц олгох байна.
Келлигээс гадна финалын шилдэг тавд “Мисс Айова” Маделин Эриксон, “Мисс Юта” Алайзия Кристофер, “Мисс Флорида” Эйлин Черкиара болон “Мисс Пенсильвания” Элизабет Войт нар шалгарчээ.
