Москва хотын Пушкины нэрэмжит номын санд ер бусын ёслол болж, Роберт, Матильда нэртэй хүн хэлбэрийн роботууд “үнэнч байх тангараг” өргөн, бугуйвч хэлбэрийн “бөгж” солилцжээ. Зохион байгуулагчид уг үйл явдлыг Орос дахь анхны робо гэр бүл үүссэн бэлгэдлийн арга хэмжээ гэж нэрлэсэн байна.
Ёслолд Догматик нэртэй робот нохой мөн оролцжээ. Арга хэмжээг Гэр бүл, хайр, үнэнч байдлын өдөрт зориулан зохион байгуулсан байна.
Роботууд өмнө нь олон нийтийн томоохон арга хэмжээнүүдэд гарч байсан ч энэ удаа тэд бүрэн хэмжээний перформансын төв дүр болсон юм. Роберт Матильдад найдвартай хамтрагч байна гэж “амласан” бол Матильда ирээдүйн бүх замд нь хамт явна гэж хариулжээ.
Хоёр гуманоид робот Оросын программ хангамжаар ажилладаг бөгөөд хөдөлгөөн, яриаг нь оператор VR технологийн тусламжтайгаар синхрончилсон байна.
Мэргэжилтнүүдийн үнэлгээ зөрөв
Роботуудын “хурим” мэргэжлийн хүрээнд янз бүрийн хариу үйлдэл төрүүлжээ. Зарим шинжээч үүнийг робот техникийн салбарт анхаарал татах амжилттай арга гэж үзсэн бол нөгөө хэсэг нь технологийн бодит дэвшлээс илүү олон нийтийн анхаарал татах шоу гэж дүгнэсэн байна.
Technored компанийн үүсгэн байгуулагч Артём Лукин энэ сэдэв олны анхаарлыг татаж байгаа нь сайн ч хиймэл оюун ухаан, робот техникийн эрсдэлийг ойлгодог хүний хувьд ийм үзэгдэл түүнд болгоомжлол төрүүлдэг гэжээ. Харин Alpha Robotics Venture сангийн тэргүүн Владимир Белый уг үйл явдлыг “анхны” гэж нэрлэх нь маргаантай бөгөөд үндсэндээ хэлэлцүүлэг үүсгэх зорилготой пиар перформанс гэж үзсэн байна.
Социологич Дмитрий Алексеев энэ ёслолыг нийгэм шинэ технологийг хэрхэн хүлээн авч байгааг шалгасан нэг төрлийн стресс-тест гэж тайлбарлажээ. Түүний хэлснээр, хүмүүс төмөр, алгоритмыг зөвхөн аюул занал гэж харахаа больж, өдөр тутмын бодит байдлын нэг хэсэг, заримдаа бүр хүний ариун ёслолуудыг “хуваалцах” шинэ хөрш мэт хүлээн авч эхэлж байна.
Ийм төрлийн перформанс нь нийгмийг хиймэл оюун ухаан, роботын оршихуйд аажмаар дасгахад нөлөөлж магадгүй гэж шинжээчид үзэж байна.
