Азийн 60 орны 4000 зочин нийслэлд чуулна
JCI олон улсын байгууллагын Ази, Номхон далайн бүсийн “Аспак-2025” чуулга уулзалтыг 2025 оны зургаадугаар сарын 12-16-ны өдрүүдэд Улаанбаатар хотод зохион байгуулахаар боллоо. Энэхүү арга хэмжээний бэлтгэл ажлын хүрээнд Нийслэлийн Засаг даргын Тамгын газрын Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр болон холбогдох албаныхан JCI Монгол байгууллагын төлөөллийг хүлээн авч уулзав.
Улаанбаатар дахин олон улсын төв болно
Чуулга уулзалтыг 2017 онд анх Улаанбаатар хотод зохион байгуулж байсан бөгөөд тухайн үед 51 орны 3600 орчим төлөөлөгч оролцож байв. Харин энэ удаа 60 орчим улс орны 4000 гаруй төлөөлөл ирэх урьдчилсан тооцоо гарчээ. “Аспак” нь залуучуудын манлайллыг дэмжих, бүс нутгийн улс орнуудын хамтын ажиллагааг гүнзгийрүүлэх, эдийн засаг, соёлын харилцааг өргөжүүлэх чухал талбар болдог.
Хотын хөгжлийг дагасан олон боломж
Уулзалтын үеэр Л.Хосбаяр хэлэхдээ: “Дэлхийн хэмжээний залуучуудын чуулга уулзалтыг Улаанбаатарт дахин хүлээн авна гэдэг нь манай улсын гадаад имидж, нийслэлийн нэр хүндийг өсгөхөөс гадна эдийн засаг, аялал жуулчлалд бодит хөшүүрэг болно. Залуусын идэвх, оролцоог нэмэгдүүлж, нийгмийн хариуцлагыг дэмжихэд ч чухал үүрэгтэй. Иймээс бид энэ арга хэмжээг бүх талаар дэмжин ажиллана” хэмээн онцлов.
Түүхэн чуулга уулзалтын товч түүх
“Аспак” нь 1951 оноос хойш жил бүр тасралтгүй зохион байгуулагдаж ирсэн бөгөөд тухайн оны ажлаа дүгнэх, дараа жилийн зорилтоо тодорхойлох зорилготой. JCI буюу Junior Chamber International байгууллага нь дэлхийн залуу манлайлагчдыг нэгтгэдэг бөгөөд тухайн арга хэмжээнд тус байгууллагын дэлхийн ерөнхийлөгч, дэд ерөнхийлөгч, сенаторууд, зөвлөхүүд зэрэг өндөр түвшний зочид оролцдог.
JCI Монгол нь 1992 онд үүсгэн байгуулагдсан бөгөөд 2015 оноос нийслэлийн Засаг даргын Тамгын газартай нягт хамтран ажиллаж ирсэн туршлагатай.
