Шинэ зохицуулалт долдугаар сарын 1-нээс хэрэгжинэ
УИХ-аас Замын хөдөлгөөний аюулгүй байдлын тухай хуульд нэмэлт, өөрчлөлт оруулж, суррон, скүтер, мопед болон түүнтэй адилтгах тээврийн хэрэгслийн хэрэглээг хуульчилж зохицууллаа.
Хуулийн төсөл 2026 оны зургаадугаар сарын 12-нд эцэслэн батлагдсан бөгөөд 2026 оны долдугаар сарын 1-нээс хүчин төгөлдөр хэрэгжиж эхлэх юм.
Насанд хүрээгүй хүүхдэд мопед, скүтер унахыг хориглов
Шинэ зохицуулалтаар 2026 оны долдугаар сарын 1-нээс улсын болон нийслэлийн хэмжээнд 18 нас хүрээгүй хүүхэд мопед, скүтер, суррон унахыг хуулиар хориглож байна.
Хэрэв насанд хүрээгүй хүүхэд мопед, скүтер болон түүнтэй адилтгах үзүүлэлт бүхий тээврийн хэрэгсэл унасан тохиолдолд эцэг, эх, асран хамгаалагчид болон тухайн тээврийн хэрэгслийг хариуцсан аж ахуйн нэгжид хариуцлага тооцохоор зохицуулжээ.
Өмнө нь нийслэлд түрээсийн үйлчилгээний зохицуулалт хэрэгжиж байв
Мопед, скүтер болон адилтгах тээврийн хэрэгслийн хэрэглээ нэмэгдсэнтэй холбоотойгоор нийслэлд өмнө нь тодорхой зохицуулалт хэрэгжүүлж байжээ.
Нийслэлийн Засаг даргын 2026 оны дөрөвдүгээр сарын 10-ны өдрийн “Зөвшөөрөл олгох тухай” А/552 дугаар захирамжаар скүтер, мопед түрээслүүлэгч байгууллагуудад Зөвшөөрлийн тухай хуулийн дагуу эрх олгосон байна.
Мөн нийслэлийн нутаг дэвсгэр дэх нийтийн эзэмшлийн гудамж, талбайг ашиглуулах гэрээ байгуулж, түрээсийн үйл ажиллагааг албан ёсоор эхлүүлж байжээ.
Зургаан компанид түрээсийн зөвшөөрөл олгож байсан
Скүтер болон мопедын түрээсийн үйлчилгээ үзүүлэх зөвшөөрлийг зургаан компанид тодорхой шаардлагын хүрээнд олгосон байна. Үүнд:
- “Тапатрип эжэнси” ХХК
- “Эко технологи” ХХК
- “Хурд хүч” ХХК
- “Жэт шаринг” ХХК
- “Юү гөү” ХХК
- “Безен номт” ХХК
Эдгээр байгууллагаар дамжуулан нийслэлд түрээсийн скүтер, мопедын үйлчилгээг тодорхой журмын хүрээнд зохион байгуулахаар төлөвлөж байжээ.
Бүртгэл, хурдны хязгаар, E-Mongolia нэвтрэлт зэрэг нөхцөл тавьсан
Нийслэлд хэрэгжиж байсан зохицуулалтын хүрээнд мопед, скүтер болон түүнтэй адилтгах тээврийн хэрэгслүүдийг бүртгэлжүүлэх арга хэмжээ авч байв.
Мөн зорчих зам, эгнээ, зогсоолын талбайг нэмэгдүүлэх, шаардлагатай газруудад хөдөлгөөн хориглох тэмдэг байрлуулах, замын хөдөлгөөнд оролцох нөхцөлийг тодорхой болгох ажлууд хийгдсэн байна.
Аюулгүй байдлыг хангах, осол, зөрчлөөс урьдчилан сэргийлэх зорилгоор хариуцлагын систем хэрэгжүүлж, хурдны дээд хязгаарыг 20 км/ц-аас хэтрүүлэхгүй байхаар тохируулжээ.
Мөн насанд хүрсэн хүн E-Mongolia системээр нэвтэрсний үндсэн дээр түрээслэх боломжтой байхаар зохицуулсан байна.
АТГ-ын саналын дараа өмнөх захирамжуудыг хүчингүй болгожээ
Дараа нь Авлигатай тэмцэх газраас “Шийдвэр хянасан тухай” албан бичиг ирүүлж, дээрх зөвшөөрөл олгосон захирамж, зохицуулалтуудыг хүчингүй болгох тухай санал хүргүүлсэн байна.
Үүнтэй холбоотойгоор Нийслэлийн Засаг даргын 2026 оны зургаадугаар сарын 2-ны өдрийн А/820 дугаар захирамжаар өмнө гаргасан зарим шийдвэрийг хүчингүй болгожээ.
Тодруулбал, “Мопед /скүтер болон түүнтэй адилтгах үзүүлэлт бүхий тээврийн хэрэгсэл/-ыг нийслэлийн гудамж, замын хөдөлгөөнд хязгаарлалттайгаар оролцуулах тухай” А/387 дугаар захирамж болон 2026 оны дөрөвдүгээр сарын 10-ны өдрийн “Зөвшөөрөл олгох тухай” А/552 дугаар захирамжууд хүчингүй болсон байна.
Хүүхдийн аюулгүй байдлыг хангах зохицуулалт чангарав
Шинэ хуулийн зохицуулалт хүчин төгөлдөр хэрэгжиж эхэлснээр скүтер, мопед, суррон зэрэг тээврийн хэрэгслийн хэрэглээнд насны хязгаар албан ёсоор тогтож байна.
Сүүлийн жилүүдэд эдгээр тээврийн хэрэгслийн хэрэглээ нэмэгдэхийн хэрээр хүүхэд, өсвөр насныхан замын хөдөлгөөнд оролцох үедээ осол, гэмтэлд өртөх эрсдэл нэмэгдсэн гэж үзэж байна.
Иймээс долдугаар сарын 1-нээс эхлэн 18 нас хүрээгүй хүүхэд мопед, скүтер, суррон унасан тохиолдолд зөвхөн хүүхэд бус, эцэг эх, асран хамгаалагч болон холбогдох аж ахуйн нэгж хариуцлага хүлээх зохицуулалт хэрэгжинэ.
