Цаг уур, орчны шинжилгээний газрын гаргасан 2026 оны 04-р сарын 09-нөөс 2026 оны 04-р сарын 13-ныг хүртэлх урьдчилсан төлвөөр ойрын өдрүүдэд нутгийн олон хэсгээр бороо, нойтон цас, цас орж, салхи шуургатай байх нь. Ялангуяа энэ сарын 12-нд ихэнх нутгаар сэрүүсэхийг анхаарууллаа.
Хур тунадасны хувьд 09-нд говийн бүс нутгийн зүүн өмнөд хэсэг, Хэнтийн уулархаг нутгаар, 10-нд Монгол-Алтай, Хэнтийн уулархаг нутаг, Онон, Улз голын хөндийгөөр, 11-нд баруун болон төвийн аймгуудын ихэнх нутгаар, 12-нд төв, зүүн аймгуудын зарим газраар бороо, нойтон цас, цас орж, цасан шуурга шуурах төлөвтэй байна.
Салхины хүч ч тодорхой өдрүүдэд нэмэгдэх төлөвтэй байна. Тухайлбал, 10, 12-нд нутгийн зарим газраар, 11-нд ихэнх нутгаар секундэд 15-17 метр хүрч ширүүсэх бөгөөд шороон шуурга шуурах аж.
Агаарын температурын хувьд Дархадын хотгор, Завхан голын эх, Хүрэнбэлчир, Идэр, Тэс, голын хөндий, Хөвсгөл, Хэнтийн уулархаг нутгаар шөнөдөө -8…-13 градус, өдөртөө +1…+6 градус байх бол Алтай, Хангайн уулархаг нутаг, Хараа, Ерөө, Туул, Тэрэлж голын хөндийгөөр шөнөдөө -3…-8 градус, өдөртөө +5…+10 градус байна.
Харин Их нууруудын хотгор, говийн бүс нутгийн өмнөд хэсгээр шөнөдөө +3…+8 градус, өдөртөө +20…+25 градус, говийн бүс нутгийн хойд хэсгээр шөнөдөө 0…+5 градус, өдөртөө +14…+19 градус дулаан байх төлөвтэй. Бусад нутгаар шөнөдөө -3…+2, өдөртөө +9…+14 градусын хооронд байна.
Урьдчилсан төлвөөс харахад 11-нд нутгийн хойд хэсгээр, 12-нд ихэнх нутгаар температур буурч, сэрүүсэх төлөв давамгайлах тул иргэд, малчид, тээвэрчид цаг агаарын өөрчлөлтийг анхаарах шаардлагатай байна.
