Соёл, спорт, аялал жуулчлал, залуучуудын яамнаас орчин үеийн хөгжмийн урсгалаар бүтээл туурвиж буй чөлөөт уран бүтээлчдэд хандан салбарын ёс зүйг эрхэмлэх тухай албан ёсны зөвлөмж гаргав. Сүүлийн үед уран бүтээлүүдэд бүдүүлэг, доромж утгатай үг хэллэг ашиглах, хүүхэд залуучуудыг хүчирхийлэл, садар самуунд уриалсан агуулга түгээх зөрчил нэмэгдэж байгаа нь ийнхүү анхааруулга өгөх үндэслэл болжээ.
Яамны зүгээс уран бүтээлчдийн илэрхийлэх эрх чөлөөг хүндэтгэхийн зэрэгцээ нийгмийн өмнө хүлээх хариуцлагыг нь сануулж, холбогдох хууль тогтоомжийн хүрээнд дараах зөвлөмжүүдийг баримтлахыг уриаллаа. Үүнд:
- Хэл найруулгын соёл: Бүдүүлэг, доромж болон садар утгатай үг хэллэг ашиглахаас эрс татгалзах;
- Агуулгын хяналт: Хүчирхийлэл, мансууруулах бодисыг сурталчлаагүй, нийгмийн ёс зүйд нийцсэн контент туурвих;
- Хүүхэд хамгаалал: Өсвөр үеийнхний хүмүүжилд сөрөг нөлөө үзүүлэхүйц ялгаварлан гадуурхах, дээрэлхэхийг өдөөсөн агуулгаас татгалзах;
- Үнэт зүйлээ дээдлэх: Үндэсний соёл, уламжлалыг үл хүндэтгэсэн илэрхийллээс зайлсхийж, эерэг хандлага, соёлын боловсролыг дэмжих;
- Хууль дээдлэх: Оюуны өмчийн эрхийг хүндэтгэж, уран бүтээлчийн нийгмийн хариуцлагаа ухамсарлах.
Тус яамнаас уран бүтээлчдийг цахим орчин болон олон нийтийн арга хэмжээний үеэр үндэсний үнэт зүйлсийг түгээн дэлгэрүүлж, залуу хойч үеийнхэндээ зөв үлгэр дуурайлал үзүүлэхүйц чанартай бүтээлүүд туурвихыг уриалав. Ингэснээр нийгэмд эерэг хандлага тогтох бөгөөд уран бүтээлчид өөрсдийн нөлөөг зөв чиглэлд ашиглах боломжтойг онцолсон юм.
