Дорнод аймгийн Матад сумын нутаг дэвсгэрт өнөөдөр 15:38 цагт 3.9 магнитудын хүчтэй газар хөдлөлт боллоо. ШУА-ийн Одон орон, Геофизикийн хүрээлэнгээс мэдээлснээр, газар хөдлөлтийн голомт нь Матад сумын төвөөс зүүн зүгт 63 км, Чойбалсан сумын төвөөс зүүн урд зүгт 156 км, Сүхбаатар аймгийн Эрдэнэцагаан сумын төвөөс хойд зүгт 147 км-ийн зайд байрлаж байжээ.
Газар хөдлөлтийн хүч болон нөлөөллийг магнитуд, балл гэсэн хоёр үзүүлэлтээр хэмждэг бөгөөд 3.9 магнитуд нь хөрсөн доорх төв хэсгийн энергийг зааж буй хэмжигдэхүүн юм. Харин газрын гадарга дээр хүн болон барилга байгууламжид мэдрэгдэх хүчийг 12 шатлалт баллаар хэмждэг. Ерөнхийдөө 3-аас доош магнитудын чичирхийлэл хүмүүст анзаарагдах нь бага байдаг бол 4-өөс дээш балл хүрэх үед гэрлийн бүрхүүл савлах, сав суулга унах зэргээр мэдэгдэхүйц мэдрэгдэж эхэлдэг байна.
Дэлхий дахинд болон манай улсад мөрдөгддөг шатлалаар 1-3 баллын хүчтэй чичирхийлэлд барилга доторх хүмүүс ялимгүй чичирхийлэл мэдэрч, эд зүйлс бага зэрэг хөдөлдөг. Хэрэв хүч нь 6-7 балл хүрвэл барилгын хана цуурах, цонх хагарах зэрэг эрсдэл үүсдэг. Одоогоор Матад суманд болсон газар хөдлөлтийн улмаас учирсан хохирол, чичирхийлэл иргэдэд хэрхэн мэдрэгдсэн талаарх нэмэлт мэдээлэл гараагүй байна.
