Улаанбаатар хотын Гэмт хэргээс урьдчилан сэргийлэх ажлыг зохицуулах зөвлөлийн салбар, нийслэлийн Цагдаагийн газар, Монголын оюутны холбоо хамтран хэрэгжүүлдэг “Оюутан цагдаа-2025” хөтөлбөр энэ зун үргэлжилнэ.
Жуулчдын аюулгүй байдалд анхаарна
Энэхүү хөтөлбөрийн хүрээнд энэ жил нийслэлийн 12 их, дээд сургуулийн 62 оюутан зуны турш гадаадын жуулчдад тусламж үзүүлж, гэмт хэрэг, зөрчлөөс урьдчилан сэргийлэх ажилд оролцоно. Тэд мөн аялал жуулчлалын талаарх мэдээлэл, зөвлөгөө өгч ажиллана.
Ажлын ачаалал, шалгуур
Оюутнуудыг гадаад хэлний мэдлэг дээр тулгуурлан сонгосон бөгөөд 6-р сарын 12-ноос 8-р сарын 10 хүртэл өдөрт 8 цаг ажиллана. Тэд нийтийн эзэмшлийн гудамж, аялал жуулчлалын бүсүүдээр жуулчдад мэдээлэл өгөх, хяналт тавих, шаардлагатай үед цагдаагийн байгууллагад мэдээлэх үүрэгтэй.
Энэхүү хөтөлбөр нь анх 2014 онд эхэлсэн бөгөөд Монгол Улсад жуулчдын тоо хамгийн ихээр нэмэгддэг зун цагт гэмт хэрэг, зөрчлөөс урьдчилан сэргийлэх, жуулчдад зөвлөгөө, тусламж үзүүлэх зорилготой юм.
