“Оскар”-ын шагналт, 79 настай жүжигчин Сюзан Сарандон Палестиныг дэмжсэн улс төрийн байр сууринаасаа болж Холливудын томоохон студиудын кино төслүүдээс хасагдсан хэвээр байгаа талаараа мэдэгдэв. Тэрбээр энэ тухайгаа 2026 оны Венецийн кино наадамд Италийн найруулагч Андреа Паллаорогийн бүтээсэн “The Echo Chamber” шинэ киногоо танилцуулах үеэрээ ярьсан байна.
Сюзан Сарандон 2023 онд Нью-Йорк хотод болсон Палестиныг дэмжсэн жагсаалын үеэр хэлсэн үгийнхээ дараа олон нийтийн хүчтэй шүүмжлэлд өртөж, улмаар түүнийг төлөөлдөг байсан “UTA” агентлаг хамтын ажиллагаагаа цуцалж байв. Жүжигчин хожим нь тухайн үед хэлсэн зарим үг хэллэгээ “ноцтой алдаа” хэмээн хүлээн зөвшөөрч уучлал хүссэн ч түүнд ирэх шахалт буураагүй байна.
Түүний онцолсноор:
- Зарим агентлаг, нөлөө бүхий хүмүүс одоо ч түүнийг кино төслүүдэд ажилд авахгүй байхыг уриалсаар байгаа.
- Холливудын томоохон студиудын бүтээлд ажиллахад хүндрэлтэй байгаа бөгөөд олон улсын хэмжээнд түүнийг илүү таатай хүлээн авдаг.
Венецийн кино наадамд нээлтээ хийсэн “The Echo Chamber”
Холливудад хязгаарлалттай тулгарч байгаа ч тэрбээр олон улсын төслүүдэд ажиллаж байна. Италийн найруулагч Андреа Паллаоро бусдын анхааруулга, эсэргүүцлийг үл тоомсорлон Сюзан Сарандоныг шинэ бүтээлийнхээ гол дүрд сонгосон бөгөөд жүжигчин түүнд гүн талархаж буйгаа илэрхийлэв.
“The Echo Chamber” кино Венецийн кино наадамд нээлтээ амжилттай хийсэн бөгөөд есдүгээр сарын 10-ны өдрөөс эхлэн Итали улсын кино театруудаар үзэгчдийн хүртээл болохоор төлөвлөгджээ.
