Бээжин Европын холбоотой хийхээр төлөвлөсөн өндөр түвшний хоёр дипломат уулзалтыг богино хугацаанд цуцалсан талаар Financial Times эх сурвалжууддаа тулгуурлан мэдээлжээ.
Эх сурвалжийн мэдээлснээр, зургадугаар сард Хятад ЕХ-той хийх хоёр чухал яриа хэлэлцээг гэнэт зогсоосон байна. Энэ шийдвэр нь Хятадын бараа бүтээгдэхүүний Европын зах зээл рүү чиглэсэн экспорт огцом нэмэгдэж, талуудын хооронд худалдааны зөрчил хурцдаж буй үед гарчээ.
Цуцлагдсан уулзалтуудын нэг нь дижитал технологийн асуудлаарх сайд нарын түвшний хэлэлцээ байсан бол нөгөө нь ЕХ-ны дипломат албаны дэд ерөнхий нарийн бичгийн дарга Олоф Скоогийн оролцох ёстой уулзалт байжээ. Financial Times-ийн ярилцсан эх сурвалжийн хэлснээр, тухайн сард товлогдсон хоёр уулзалтыг Бээжин “маш богино хугацааны өмнө” цуцалсан байна.
Худалдааны маргаан хурцдаж буй үе
Хятадын тал шийдвэрийнхээ албан ёсны шалтгааныг тайлбарлаагүй байна. Гэсэн ч ийм алхамыг улс орнууд ихэвчлэн нөгөө талын бодлого, байр сууринд дургүйцэж буйгаа илэрхийлэх дипломат дохио болгон ашигладаг.
ЕХ, Хятадын хоорондын харилцаанд ижил төстэй жишээ өмнө нь гарч байв. 2025 онд Брюссель долдугаар сарын удирдагчдын дээд хэмжээний уулзалтын өмнө Бээжинтэй хийх эдийн засгийн хэлэлцээг зохион байгуулахаас татгалзсан. Тухайн үед энэ шийдвэр худалдааны маргаанд ахиц гараагүйтэй холбоотой байж болзошгүй гэж үзэж байсан юм.
Одоогийн нөхцөл байдал нь ЕХ, Хятадын харилцаанд хуримтлагдсан худалдаа, технологи, экспортын бодлогын санал зөрөлдөөн улам мэдэгдэхүйц болж байгааг харуулж байна.
