Eurostat байгууллагын 2025 оны тайланд дурдсанаар Европын Холбооны залуучууд эцэг эхийнхээ гэрээс нүүж, тусдаа гарах дундаж нас 26.3 байна. Энэхүү үзүүлэлт нь тухайн улс орны газар зүйн байршил болон нийгмийн соёлоос хамаарч асар их зөрүүтэй байгаа нь анхаарал татаж байгаа юм.
Европын хойд хэсэгт буюу Финланд, Дани, Швед зэрэг орнуудад залуус хамгийн эрт буюу 21.4-өөс 21.9 насандаа бие даан амьдарч эхэлдэг. Харин тивийн өмнөд хэсэг болох Хорват, Грек, Италид энэ процесс харьцангуй хожуу явагддаг бөгөөд залуус нь 30.1-ээс 31.3 нас хүртлээ эцэг эхтэйгээ хамт амьдарсаар байна. Европ тивийн эдийн засгийн гол цөм болсон Герман, Франц улсуудын хувьд залуучууд нь дунджаар 23.5-аас 23.9 насандаа тусдаа гардаг ажээ.
Шинжээчид залуусын бие даах насанд хэд хэдэн гол хүчин зүйл нөлөөлдөг болохыг онцолж байна. Үүнд залуучуудын орлогын түвшин, орон сууцны олдоц болон түрээсийн үнэ, гэр бүлийн уламжлалт харилцаа болон тухайн бүс нутгийн хүн амын төвлөрөл зэрэг нийгэм-эдийн засгийн цогц асуудлууд багтдаг. Хойд Европын орнуудад залууст зориулсан нийгмийн халамж, тэтгэлэг болон түрээсийн зах зээл маш сайн хөгжсөн байдаг нь тэднийг эрт бие даахад гол түлхэц болдог байна.
