Монгол Улсын Ерөнхийлөгч Ухнаагийн Хүрэлсүх Бүгд Найрамдах Казахстан Улсын Ерөнхийлөгч Касым-Жомарт Кемелевич Токаевын урилгаар 2026 оны 04 дүгээр сарын 20-ноос 23-ны өдрүүдэд тус улсад төрийн айлчлал хийхээр хүрэлцэн очлоо. Ерөнхийлөгчийг Астана хотын “Нурсултан Назарбаев” олон улсын нисэх онгоцны буудалд Казахстан улсын Гадаад хэргийн сайд Е.Кошербаев болон Монгол Улсаас тус улсад суугаа Онц бөгөөд Бүрэн эрхт Элчин сайд Г.Батжаргал тэргүүтэй албаны хүмүүс хүндэтгэлтэйгээр угтан авсан юм.
Айлчлалын хөтөлбөрийн дагуу хоёр улсын төрийн тэргүүнүүд ганцаарчилсан уулзалт хийж, албан ёсны хэлэлцээ өрнүүлэх бөгөөд үүний дараа хэвлэл мэдээллийнхэнд зориулж хамтарсан мэдээлэл өгөхөөр төлөвлөжээ. Мөн Ерөнхийлөгч У.Хүрэлсүхэд Казахстаны Парламентын дарга болон Ерөнхий сайд нар бараалхаж, хоёр талын харилцааг өргөжүүлэх асуудлаар санал солилцохоос гадна Засгийн газар болон байгууллага хоорондын эрх зүйн баримт бичгүүдэд гарын үсэг зурна. Түүнчлэн Монгол Улсын төрийн тэргүүн Астана хотноо зохион байгуулагдах Экологийн асуудлаарх бүс нутгийн дээд түвшний уулзалтад оролцох юм.
Казахстан улс нь 1991 оны 12 дугаар сарын 16-нд тусгаар тогтнолоо тунхагласан, 20 гаруй сая хүн амтай, нутаг дэвсгэрийн хэмжээгээр дэлхийд есдүгээрт жагсдаг хүчирхэг гүрэн билээ. Ерөнхийлөгчийн засаглалтай тус улс 2022 онд Үндсэн хуульдаа өөрчлөлт оруулж, төрийн тэргүүний бүрэн эрхийн хугацааг 7 жил болгон сунгасан бөгөөд Ерөнхийлөгч К.Токаев тухайн ондоо дахин сонгогдон ажиллаж байна. Эдийн засгийн хувьд дотоодын нийт бүтээгдэхүүн нь 300 тэрбум ам.долларт хүрсэн бөгөөд нэг хүнд ногдох хэмжээ нь 14,700 ам.доллар байгаа юм.
Хоёр орны худалдаа, эдийн засгийн харилцааг тоон үзүүлэлтээр илэрхийлвэл:
- Худалдааны эргэлт: Өнгөрсөн онд 58 сая ам.доллар давсан нь 2024 онтой харьцуулахад 7.2 хувиар өссөн үзүүлэлт юм.
- Экспорт, импорт: Монгол Улс адууны мах, ноос, ноолууран бүтээгдэхүүн, хивс нийлүүлдэг бол Казахстанаас гурилан бүтээгдэхүүн, чихэр, цагаан будаа, тамхи зэргийг импортолдог.
- Аж ахуйн нэгж: Казахстаны хөрөнгө оруулалттай 74 аж ахуйн нэгж манай улсад бүртгэлтэй байна.
- Иргэдийн зорчих хөдөлгөөн: 2025 онд хоёр улсын хооронд тус бүр 24 мянга гаруй иргэн харилцан зорчжээ.
- Боловсрол: Казахстаны Засгийн газрын тэтгэлгээр 2025-2026 оны хичээлийн жилд 22 монгол оюутан шинээр элсэн суралцаж байна.
Казахстан улс нь байгалийн баялгийн нөөцөөрөө дэлхийд тэргүүлэгч орнуудын нэг бөгөөд уран, вольфрамын нөөцөөр нэгдүгээрт, хром, фосфороор хоёрдугаарт, харин газрын тосны нөөцөөр 12 дугаар байрт эрэмбэлэгддэг. Тус улсын гадаад худалдааны нийт эргэлт өнгөрсөн онд 144 тэрбум ам.долларт хүрсэн нь манай хоёр орны эдийн засгийн хамтын ажиллагааг цаашид улам бүр тэлэх асар их нөөц боломж байгааг илтгэж байна.
