Ерөнхий сайд Н.Учрал Баянгол дүүргийн Эрүүл мэндийн төвд ажиллах үеэрээ салбарын ажилтан, албан хаагчид болон иргэдийн төлөөлөлтэй уулзаж, эрүүл мэндийн салбарт тулгамдаж буй асуудлуудыг хэлэлцлээ. Уулзалтын дараа богино хугацаанд шийдвэрлэх шаардлагатай хэд хэдэн асуудлаар холбогдох албан тушаалтнуудад тодорхой чиглэл, үүрэг өгсөн байна.
Тухайлбал, эмч, ажилчдын цалингийн нэмэгдлийг нэмэгдсэн суурь цалингаас тооцож олгох асуудлыг судалж, шаардлагатай тооцооллыг шуурхай хийхээр болжээ. Үүний дараа уг асуудлыг ойрын хугацаанд Засгийн газрын хуралдаанд танилцуулахаар болсон байна.
Эмч, ажилчдын цалинг 2026 онд 75 хувь нэмэх шийдвэр өмнө нь гарсан бөгөөд одоогоор 30 хувь нь хэрэгжээд байгаа юм. Үлдсэн нэмэгдлийг 8, 9, 10, 11, 12 дугаар сард тус бүр есөн хувиар үе шаттай олгож, 2026 оны төгсгөл гэхэд нийт өсөлт 75 хувь хүрэхээр төлөвлөжээ.
Эрүүл мэндийн салбарын цалин нь үндсэн, нэмэгдэл, нэмэгдэл хөлс буюу илүү цаг, үр дүнгийн урамшуулал гэсэн дөрвөн хэсгээс бүрддэг байна. Одоогийн байдлаар илүү цагаас бусад нэмэгдлийг 30 хувь нэмэгдээгүй цалингаас тооцон олгож байсан бол үүнийг өөрчилж, цалингийн өсөлтийг шингээсэн дүнгээс бүх төрлийн нэмэгдлийг тооцдог тогтолцоо руу шилжүүлэхээр болжээ.
Энэ ажлыг ойрын хугацаанд зохион байгуулж хэрэгжүүлэхийг Монгол Улсын Ерөнхий сайд Н.Учрал Эрүүл мэндийн сайд Э.Батшугарт үүрэг болгосон байна. Ингэснээр цалингийн өсөлтийн үр нөлөө эмч, ажилчдын гар дээр очих бодит орлогод илүү тодорхой тусах нөхцөл бүрдэхээр байна.
Мөн Засгийн газар эрүүл мэндийн салбарт хэмнэлтийн бодлого хэрэгжүүлэхгүй гэдгээ Ерөнхий сайд онцолжээ. Тэрбээр салбарын ажилтнуудын нийгмийн асуудалд анхаарал хандуулсан бодлого баримтална гэдгээ илэрхийлсэн байна.
Үүнээс гадна эрүүл мэндийн салбарын доголдлын гол шалтгааны нэг болсон цахимжилт болон эрүүл мэндийн даатгалын тогтолцоог шинэ шатанд гаргаж чадвал олон асуудлыг цогцоор нь шийдвэрлэх боломжтой гэж үзэж буйгаа тэр хэлсэн байна. Энэ хүрээнд шинэ сайдад өндөр хүлээлт тавьж байгаагаа ч сануулжээ.
Ерөнхий сайд мөн монгол эмч нарын ур чадвар дэлхийн түвшинд хүрсэн ч эмийн чанар тэдний ажлын үр дүнд сөргөөр нөлөөлж байгааг онцолсон байна. Иймээс эмийн чанарт онцгой анхаарч, эрүүл мэндийн даатгалын сангаас хөнгөлөлттэй олгодог эмийн жагсаалтыг нарийвчлан судалж, иргэдийн хэрэгцээ шаардлагад нийцүүлэх чиглэл өгчээ.
- Цалингийн нэмэгдлийг нэмэгдсэн суурь цалингаас тооцох асуудлыг Засгийн газрын хуралдаанд танилцуулна.
- 2026 онд эмч, ажилчдын цалинг нийт 75 хувь нэмэхээр төлөвлөсөн.
- Илүү цагаас бусад бүх нэмэгдлийг шинэчилсэн цалингаас бодох өөрчлөлт хийгдэнэ.
