Технологийн ертөнцийн аварга “Apple” компанид сүүлийн 15 жилийн турш Тим Күүкийн эхлүүлсэн нэгэн эрин үе өндөрлөж байна. Тус компанийг дэлхийн хамгийн өндөр үнэлгээтэй буюу 3.6 их наяд ам.долларын босгонд хүргэсэн Тим Күүк гүйцэтгэх захирлын албан тушаалаа хүлээлгэн өгөхөөр болсныг Reuters агентлаг мэдээллээ. Хэдийгээр тэрээр CEO-ийн ажлаа өгч байгаа ч компанийн үйл ажиллагаанаас бүрмөсөн холдолгүй, Төлөөлөн удирдах зөвлөлийн даргын хувиар үүргээ үргэлжлүүлэн гүйцэтгэх юм.
Түүний халааг Apple-ийн техник хангамжийн инженерчлэлийг хариуцан ажиллаж байсан Жон Тернус авахаар боллоо. Тернус нь компанийн дотоод бүтцийг сайн мэддэг төдийгүй Apple-ийн хамгийн амжилттай бүтээгдэхүүнүүдийг хөгжүүлэхэд биечлэн оролцсон туршлагатай нэгэн юм. Түүний карьерын замналыг тоймловол:
- 1997 он: Пенсильванийн их сургуулийг механик инженерчлэлийн чиглэлээр төгсөж, “Virtual Research Systems” стартапаас ажлын гараагаа эхэлсэн.
- 2001 он: Apple компанид элсэн орж, Mac компьютерын зах зээлийг дахин сэргээхэд шийдвэрлэх хувь нэмэр оруулсан.
- 2013 он: Техник хангамжийн инженерчлэл хариуцсан дэд ерөнхийлөгчөөр томилогдсон.
- 2021 он: Тус салбарын инженерчлэлийн албыг бүрэн хариуцаж эхэлсэн бөгөөд iPad, AirPods, Mac зэрэг гол төхөөрөмжүүдийг бүтээхэд голлох үүрэг гүйцэтгэв.
Удирдлагын энэхүү шилжилт Apple-ийн хувьд нэн эгзэгтэй цаг үед тохиож байна. Учир нь хиймэл оюун ухааны салбарт хөрөнгө оруулагчдын хүлээлт нэмэгдэж, Nvidia компани зах зээлийн үнэлгээгээрээ Apple-ийг гүйцэж түрүүлээд байгаа юм. Шинэ захирал Жон Тернусийн өмнө хиймэл оюун ухааныг iPhone болон бусад бүтээгдэхүүнүүдэд амжилттай нэгтгэж, технологийн салбарт тэргүүлэх байр сууриа эргүүлэн авах том сорилт тулгараад байна.
