АНУ-д 84 настай Присцилла Слэк хэмээх эмэгтэй алдааны улмаас нас барснаар бүртгэгдсэнээс хойш төрийн байгууллагуудад амьд гэдгээ баталж чадахгүй хоёр жил гаруй болж байгаа тухай “Daily Mirror” хэвлэл мэдээллээ.
Слэкийн нөхөр хоёр жилийн өмнө нас барсны дараа мэдээллийн санд Присциллаг нөхөртэйгээ нэг өдөр нас барсан хэмээн эндүүрэн тэмдэглэснээр энэхүү асуудал эхэлжээ. Анхандаа тэрээр үүнийг удахгүй засагдах хүнд суртлын жижиг алдаа хэмээн тоглоом болгон хүлээж авсан ч бэрхшээлүүд улам дараалсаар байв. Эхлээд банкны дансыг нь цоожилж, дараа нь зээлийн картыг нь хүчингүй болгосон бөгөөд сонгууль өгөхөөр очиход нь түүнийг сонгогчийн хувиар мөн л нас барснаар бүртгэсэн байжээ.
Төрийн байгууллагуудын хүнд суртал
Уг алдаа АНУ-ын Нийгмийн хамгааллын газраас үүдэлтэй гэж Слэк мэдэгдэж байна. Нийгмийн хамгааллын газраас алдааг зассан гэж мэдээлдэг ч бусад байгууллагууд түүнийг нас барсан мэтээр харьцсаар байгаа аж. Саяхан тэрээр Татварын албанаас (IRS) нас барсан хүний нийгмийн даатгалын дугаараар татварын тайлан ирүүлсэн тухай бичиг хүлээн авч, тухайн дугаар нь өөрийнх нь дугаар мөн гэдгийг дахин батлах шаардлагатай болжээ.
Эмэгтэйн ярьснаар Татварын алба болон Нийгмийн хамгааллын газрын хооронд бичиг баримт хөөцөлдөх явдал эцэс төгсгөлгүй үргэлжилж, тэрээр өөрийн оршин байгаагаа дахин дахин батлахаас эцэстээ залхсан байна. Тэрээр төрийн байгууллагууд гаргасан алдаагаа өөрсдөө засах ёстой гэж үзэж байгаа бөгөөд Татварын албанаас уг асуудлыг шийдвэрлэхээр тусгай хэлтэст шилжүүлснээ мэдэгджээ.
