Нийслэлийн Засаг даргын санаачилгаар уламжлал болгон зохион байгуулдаг сар шинийн баярт зориулсан “Амар байна уу 2026” өргөтгөсөн үзэсгэлэн худалдаа 4 дэх жилдээ амжилттай нээлтээ хийлээ. Тус үзэсгэлэн худалдаа нь үндэсний үйлдвэрлэгчдийг дэмжих, иргэдийн худалдан авалтыг хөнгөвчлөх зорилгоор бүтэн нэг сарын турш буюу 2026 оны нэгдүгээр сарын 17-ноос хоёрдугаар сарын 17-ныг хүртэл үргэлжилнэ.
Энэ удаагийн үзэсгэлэн худалдаанд 21 аймаг, есөн дүүргийн 1000 орчим ЖДҮ эрхлэгч оролцож, 55 мянган нэр төрлийн бүтээгдэхүүнээ борлуулж байна. Зохион байгуулагчдын зүгээс үндэсний үйлдвэрлэгчдээ дэмжих зорилгоор түрээсийн төлбөр авахгүй байх шийдвэр гаргасан нь бараа бүтээгдэхүүн үйлдвэрийн үнээр хэрэглэгчдэд хүрэх нөхцөлийг бүрдүүлжээ. Өнгөрсөн жилийн худалдаагаар бизнес эрхлэгчид 54.8 тэрбум төгрөгийн орлоготой ажилласан амжилттай байгаа юм.
Үзэсгэлэн худалдааны онцлох мэдээллүүд:
- Оролцогчид: 21 аймаг, 9 дүүргийн ЖДҮ эрхлэгчид болон гар урлаачид.
- Хугацаа: 2026 оны 1-р сарын 17-ноос 2-р сарын 17-ныг дуустал.
- Бүтээгдэхүүн: 55,000 гаруй нэр төрлийн бараа, тэр дундаа эсгий эдлэл, ноос ноолууран хувцас, дархны ур хийцтэй бүтээлүүд.
- Давуу тал: Түрээсийн төлбөргүй тул үйлдвэрийн үнээр худалдан авалт хийх боломжтой.
- Байршил: Нийслэлийн дүүрэг бүр өөрсдийн онцлогт тохирсон талбайд зохион байгуулж байна.
Үйлдвэрлэгчдийн онцлох бүтээгдэхүүнүүд
Үзэсгэлэнд оролцож буй “Дуут урлан”-гийн дархан Д.Баярхуяг шинэ загварын шатар болон бэлэг дурсгалын зүйлсээрээ оролцож байгаа бол “Үжин бренд”-ийн үүсгэн байгуулагч С.Саран байгалийн өнгөөрөө байгаа ноос, ноолууран ороолт, дээл хувцас болон уран бичлэгтэй гоёлын хэрэглэлүүдээ дэлгэжээ. Мөн Сүхбаатар дүүргийн ЖДҮ эрхлэгч Г.Тунгалаг монгол ахуй, бэлгэдлийг агуулсан гар урлалын бүтээгдэхүүн, тоглоомоороо иргэдийн сонирхлыг татаж байна. Энэхүү арга хэмжээ нь бүтээгч, үйлдвэрлэгч, урлаачдын нэгдэл болж чадаж байгааг оролцогчид онцоллоо.
