2025 онд дэлхийн хэмжээнд таван залуу тутмын нэг нь ямар нэгэн боловсролын хөтөлбөрт хамрагдаагүй, эсвэл хөдөлмөр эрхлээгүй байна. НҮБ-ын төрөлжсөн байгууллага болох Олон улсын хөдөлмөрийн байгууллага (ОУХБ) энэ жилийн хөдөлмөр эрхлэлтийн төлөв байдлын тайландаа энэ тухай дурджээ.
Баримт бичигт дурдсанаар, сурч боловсроогүй, ажил эрхлээгүй эсвэл мэргэжлийн бэлтгэлд хамрагдаагүй (NEET) залуучуудын эзлэх хувь 20 хувьд хүрсэн байна. Энэ нь нийт 257 сая хүн ирээдүйд хөдөлмөрийн зах зээлд өрсөлдөхөд шаардлагатай мэдлэг, туршлага олж авах боломжоо алдсан гэсэн үг болохыг ОУХБ-ын шинжээчид онцолжээ.
Хөдөлмөр эрхлэлтийн төлөв байдал:
- 2025 онд сурч боловсроогүй, ажил эрхлээгүй залуучуудын тоо дэлхийн хэмжээнд 257 сая хүнд хүрсэн.
- Өндөр орлоготой орнуудад энэхүү үзүүлэлт хамгийн бага буюу 10.9% байгаа бол бага орлоготой орнуудад хамгийн өндөр буюу 27.9%-тай байна.
- Энэхүү сөрөг хандлага 2023 оноос эхэлсэн бөгөөд 2027 он хүртэл бага зэрэг өсөх төлөвтэй байгааг шинжээчид анхааруулж байна.
- Нийт залуучуудын 20% буюу таван хүн тутмын нэг нь ирээдүйн боломжоо алдаж байна.
