Монголын шилдэг тамирчид Нэтфликсийн дэлхийн хэмжээний шоунд өрсөлдөнө
Ази, Номхон далайн бүсийн найман улсын хүчирхэг багуудын өрсөлдөөн болох “Physical: Asia” шоу энэ мягмар гарагт Netflix дээр нээлтээ хийх гэж байна. Өнөөдөр тус шоуны албан ёсны YouTube хуудсанд Монгол Улсаас оролцох багийн танилцуулгыг олон нийтэд хүргэлээ.
Монгол Улсыг төлөөлөн дараах зургаан тамирчин, уран бүтээлчид оролцоно. Тэд өөр өөр спортын төрөл, ур чадвараараа ялгардаг.
- Монгол Улсын арслан Б.Орхонбаяр
- Холимог тулаанч Б.Энх-Оргил
- 3х3 сагсан бөмбөгийн шигшээ багийн тамирчин Э.Дөлгөөн
- Волейболын үндэсний шигшээ багийн тамирчин Г.Хандсүрэн
- Жүдогийн үндэсний шигшээ багийн тамирчин А.Адъяасүрэн
- Монгол Улсын гавьяат жүжигчин, уран нугараач Э.Лхагва-Очир
Тэд “Physical: Asia” шоуны тайзан дээр эх орныхоо нэрийг өндөрт өргөж, хүч чадал, авхаалж самбаагаа сорих юм.
Нэг тэрбум воны шагналын төлөө тив дамнасан тулаан
Энэхүү бодит өрсөлдөөнт шоу нь Өмнөд Солонгос, Япон, Индонез, Тайланд, Филиппин, Австрали, Турк, Монгол гэсэн найман орны шилдэг өрсөлдөгчдийг нэгтгэж, нэг тэрбум воны (ойролцоогоор 696,000 ам.доллар) шагналын төлөө хүч үзүүлэх “Нэтфликсийн Олимп” хэмээн нэрлэгдэж байна.
Шоуны найруулагч Чан Хо Ги “Physical: Asia”-г тэсвэр, авхаалж, багаар ажиллах чадварын туйлын сорил гэж тодорхойлсон бөгөөд дэлхий даяарх үзэгчид Монголын тамирчдын амжилтыг тэсэн ядан хүлээж байна.
