Өнгөрсөн долоо хоногийн байдлаар улсын хэмжээнд нийслэлийн найман дүүрэг болон 18 аймгийн 44 суманд аюулт үзэгдэл, ослын 121 дуудлага хүлээн авсан талаар Онцгой байдлын ерөнхий газраас мэдээллээ.
Дуудлагуудын дагуу төв болон орон нутгийн Онцгой байдлын байгууллагын алба хаагчид шуурхай ажиллаж, 7 иргэний амь насыг авран хамгаалсан байна. Мөн 46 иргэнийг утаа ихтэй бүсээс гарган, аюулгүй байдлыг хангаж ажиллажээ.
Дуудлагын тоон үзүүлэлтийг дараах байдлаар ангилжээ:
- 79 хувь буюу 96 тохиолдол нь объектын гал түймэртэй холбоотой;
- 7 хувь буюу 9 тохиолдол нь ой, хээрийн түймэр;
- 12 хувь буюу 15 тохиолдол нь хүний үйл ажиллагаатай холбоотой осол;
- Үлдсэн 1 тохиолдол нь биологийн гаралтай аюулт үзэгдэл байжээ.
Онцгой байдлын албаныхан энэ хугацаанд нийт дуудлагад мэргэжлийн түвшинд, цаг алдалгүй хариу арга хэмжээ авч, олон хүний амь насыг авран хамгаалсан гэж мэдээллээ.
