K-pop-ийн дэлхийн хэмжээний төлөөлөл болсон BLACKPINK хамтлаг сүүлийн үед шинэ уран бүтээл гаргаагүй байсан ч “JUMP” нэртэй дууны клипээр эргэн ирж, фенүүдийнхээ анхаарлыг татлаа. Шинэ дуун дээрээ тэд “Deadline” аялан тоглолтын үеэр тайзны үзүүлбэр үзүүлж, шүтэн бишрэгчдийнхээ хүсэн хүлээсэн мөчийг биелүүлсэн ч, дууны клип нь шүүмжлэл дагуулж эхэлжээ.
Фенүүдийн хүлээлт ба бодит байдал
Хамтлагийн цоглог хэмнэлтэй, шинэлэг агуулгатай дууг фенүүдийн зарим нь таашаасан ч, клипийн гүйцэтгэл, дүрслэлийн шийдэлд олон хүн сэтгэл дундуур үлдэв. Ялангуяа хамтлагийн өмнөх бүтээлүүдтэй харьцуулахад “JUMP”-ын клип бүжиггүй, сэтгэл хөдлөл дутмаг, хиймэл мэт санагдсан гэж дүгнэгсэд олон байлаа.
Зарим сонсогчид шинэ хэв маяг туршиж байгааг дэмжиж буйгаа илэрхийлсэн ч, BLACKPINK-ийн уламжлалт “сүр хүчтэй, гоёмсог” өнгө аясаас хэтэрхий хөндий санагдсан гэжээ. CGI буюу компьютер графикийг хэт их ашигласан нь “хиймэл, сүнсгүй” харагдаж, клипийн үнэ цэнийг бууруулсан гэх шүүмж зонхилж байна.
“Дуу нь дажгүй ч клип нь үнэхээр ойлгомжгүй, хямд хийцтэй. Ямар нэгэн логик, урсгал байхгүй, бүжиг ч алга,” хэмээн нэгэн фен сэтгэгдэл үлдээжээ.
Харин дууны хувьд үнэлгээ өндөр
Дууны хөгжмийн шийдэл, хэмнэл, өнгө аяс нь шүтэн бишрэгчдийн таашаалд нийцэж байгаа бололтой. Зарим нь “дууг нь сонсоод клипийг нь үзэхгүй” гэжээ. Шинээр туршсан дууны өнгө, хоолойн найруулгыг магтсан сэтгэгдэл ч олон байв. Гэхдээ клип дээр хангалттай анхаарал хандуулаагүй нь хамгийн их шүүмж дагуулсан зүйл байлаа.
“AI дүрүүд нь хатуу, хиймэл харагдаж байна. BLACKPINK шиг том хамтлагт илүү сайн клип зохих ёстой байсан,” хэмээн өөр нэгэн шүүмжлэв.
Уран бүтээлчид шинэ сорилттой тулгарч байна
Шинэ дуу “JUMP” нь BLACKPINK-ийн хэв маягаас сэтгэл татам байдлаараа ялгарч байгаа ч, клипийн ур чадвар, уран сайхны шийдэл шүтэн бишрэгчдийн сэтгэлд нийцсэнгүй. Клипийн агуулгад бүжгийн хэсэг бараг байхгүй, дүрслэлүүд нь хиймэл мэт санагдсан нь фэнүүдийн урмыг хугалсан юм.
Тэгсэн ч шүтэн бишрэгчдийн зарим нь дууг илүү олон удаа сонсвол улам дуртай болох болов уу гэсэн найдлага илэрхийлж байв.
