2025 оны 7-р сарын 10-ны өдрийн 11:00 цагийн байдлаар улсын хэмжээнд Сэлэнгэ аймагт нийт 11 ойн түймэр бүртгэгдээд байна. Эдгээрээс 9 түймэр цурамд орсон бол үлдсэн 2 түймрийн унтраах ажиллагаа үргэлжилж байна.
Цурамд оруулсан түймрийн байршлууд:
- Мандал сум: Сэртэнгийн ам, Бугат уул, Харгантын хушуу, Бага харгант
- Ерөө сум: Могойн гол, Нугар салаа, Асгатын ам
- Хүдэр сум: Шоргоолжны хадтай хошуу
- Цагааннуур сум: Баруун голын эх
Харин Ерөө суманд гарсан 2 түймэр одоогоор бүрэн унтраагдаагүй бөгөөд Онцгой байдлын алба хаагчид галын голомтод ажиллаж байна.
Түймрийн голомтод ажиллаж буй бүрэлдэхүүн:
- Онцгой байдлын ерөнхий газар болон орон нутгийн алба хаагчид – 275 хүн, 13 автомашин
- Орон нутгийн мэргэжлийн ангиуд – 131 хүн, 23 автомашин, 2 мотоцикл
- Нийт: 406 хүн, 36 автомашин, 2 мотоцикл
Онцгой байдлын алба хаагчид болон орон нутгийн мэргэжлийн ангиуд хамтран ойн түймрийг бүрэн унтраахаар шөнийн цагаар ч ажиллагаагаа үргэлжлүүлж байгаа талаар мэдээлэв.
