Монгол Улсын Ерөнхийлөгч Ухнаагийн Хүрэлсүх Сэлэнгэ аймагт ажиллах үеэрээ төв талбайд хуран цугласан орон нутгийн иргэд, төрийн албан хаагчидтай уулзаж, улс орны нийгэм, эдийн засгийн төлөв байдал болон үндэсний хэмжээний томоохон хөтөлбөрүүдийн үр дүнг танилцууллаа. Төрийн тэргүүнийг хүрэлцэн ирэхэд Сэлэнгэ цэргийн хүрээний хүндэт харуул ёслол төгөлдөр угтан авсан байна.
Эдийн засгийн өсөлт ба Сэлэнгэ аймгийн түүхэн амжилт
Уулзалтын үеэр Ерөнхийлөгч эдийн засаг 6.8 хувиар өсөж, нэг хүнд ногдох ДНБ 7,000 ам.долларыг давж, гадаад валютын албан нөөц 7 тэрбум ам.долларт хүрснийг онцлов. Мөн улсын хэмжээнд хураан авсан 745 мянган тонн ургацын багагүй хувийг Сэлэнгэчүүд бүрдүүлснийг сайшаалаа. Сэлэнгэ аймаг энэ онд нэг га талбайгаас дунджаар 18.9 центнер ургац хураан авсан нь атар эзэмшсэний 67 жилийн түүхэн дэх хамгийн өндөр үзүүлэлт болсон төдийгүй “Тэрбум мод” хөдөлгөөний хүрээнд 33.6 сая мод тарьж ургуулаад байна.
Төрийн тэргүүн сүүлийн жилүүдэд гадаад харилцаа өргөжиж, 21 улсын төрийн тэргүүн Монгол Улсад айлчилсныг дурдаад, хэрэгжиж буй томоохон хөтөлбөрүүдийн тоон мэдээллийг танилцууллаа:
- “Цагаан алт” хөтөлбөр: Самнасан ноолуурын экспорт тав дахин нэмэгдэж, 330 сая ам.долларт хүрсэн,
- “Хүнсний хувьсгал” хөдөлгөөн: 53 шинэ хүнсний үйлдвэр ашиглалтад орж, 1,000 гаруй нэр төрлийн шинэ бүтээгдэхүүнийг зах зээлд нийлүүлсэн,
- “Тэрбум мод” үндэсний хөдөлгөөн: Улсын хэмжээнд нийт 140 сая гаруй мод суулгаж, ургуулаад байна.
Ерөнхийлөгч цаашид эрчим хүч, газрын тосны бүтээгдэхүүн, хүнс, цемент, ган, бордооны хэрэгцээг дотоодоосоо бүрэн хангаж, экспортлогч улс болох стратегийн зорилтыг дэвшүүлээд, төрийн бүх шатанд сахилга, хариуцлагыг чангатган, эв нэгдлийг эрхэмлэхийг уриаллаа.
Төрийн дээд шагнал гардуулалт ба эрүүл мэндийн салбарын дэмжлэг
Айлчлалын үеэр Сэлэнгэ аймгийн Ерөө сумын “Сэлэнгэ буудай” компанийн захирал Мягмарын Шинэчулуунд Гавьяат механикжуулагч, Сүхбаатар сумын 3 дугаар цэцэрлэгийн эрхлэгч, Монгол Улсын зөвлөх багш Пунцагийн Амарсанаад Гавьяат багш цол тус тус хүртээж, салбартаа үр бүтээлтэй ажилласан иргэдийг төрийн одон, медалиар шагнав. Мөн өдөр Ерөнхийлөгч аймгийн Нэгдсэн эмнэлгийн хамт олонтой уулзаж, орон нутгийн тусламж үйлчилгээний хүртээмжийг сайжруулах зорилгоор туулах чадвар сайтай, бүрэн тоноглогдсон түргэн тусламжийн автомашин болон шаардлагатай тоног төхөөрөмжийг гардуулан өглөө.
Монгол Улсын газар тариалангийн гол бүс нутаг болох Сэлэнгэ аймаг атар эзэмшсэний түүхт хугацаанд дээд амжилт тогтоон ургац хурааж, ойжуулалтын ажлыг тэргүүлж буй нь үндэсний хэмжээний бодлогуудын бодит үр дүнг илтгэж байна. Хүнс, хөдөө аж ахуй болон суурь түүхий эдээ дотоодоосоо хангах стратегийн зорилтыг хангахад газар тариалангийн бүс нутгийн энэхүү идэвх зүтгэл, төрийн дэмжлэг нь улсын нийгэм, эдийн засгийн бие даасан байдалд шийдвэрлэх суурь түлхэц болж байна.
