Мэргэжлийн боксын дэвжээнд эх орноо төлөөлөн амжилттай тулалдаж буй Монгол Улсын Гавьяат тамирчин Эрдэнэбатын Цэндбаатар ээлжит хариуцлагатай тулаанаа Тажикистаны боксчин Мухаммад Якубовтой хийхээр албан ёсоор зарлалаа. Уг тулаан анх өнгөрсөн дөрөвдүгээр сард зохион байгуулагдахаар товлогдсон ч тодорхой шалтгаануудын улмаас хойшлогдоод байсан бөгөөд ийнхүү арваннэгдүгээр сарын 13-ны өдөр АНУ-ын Техас мужид явагдахаар тов гарсан байна.
WBC холбооны 130 фунтын жингийн сорилт
Энэхүү халз тулаан нь мэргэжлийн боксын нэр хүндтэй WBC холбооны “super featherweight” буюу 130 фунтын (58.9 кг) жингийн ангилалд өрнөх юм. Хоёр тамирчны тулаан нь тус жингийн шилдгүүдийн эрэмбийг өөрчлөхүйц чухал үйл явдал болж байгаа бөгөөд АНУ-ын боксын зах зээлд өөрсдийн нэр хүндийг бататгах том боломж болж байна.
Өрсөлдөгч Мухаммад Якубовын амжилт
Э.Цэндбаатарын өрсөлдөгч Мухаммад Якубов нь мэргэжлийн рингэнд нийт 24 тулаан хийснээс 23-т нь ялалт байгуулж, ердөө ганц ялагдсан өндөр үзүүлэлттэй тамирчин юм. Түүнчлэн тэрбээр нийт ялалтынхаа 12-ыг нь хүнд цохилт буюу нокаутаар өөрийн талд шийдэж байсан хүчтэй цохилттой бөгөөд одоогоор тус жингийнхээ дэлхийн чансааны долдугаарт бичигдэж байна.
Дэлхийн чансааны эхний аравт эрэмбэлэгдсэн хүчирхэг өрсөлдөгчтэй хүч үзэх энэхүү тулаан нь МУГТ Э.Цэндбаатарын мэргэжлийн замналын хамгийн хариуцлагатай сорилтуудын нэг болж байна. Тэрбээр уг тулаанд ялалт байгуулж чадвал өөрийн чансааг мэдэгдэхүйц ахиулж, цаашлаад дэлхийн аваргын бүсийн төлөө шууд тулалдах албан ёсны өрсөлдөгчөөр нэрлэгдэх томоохон боломжийг бүрдүүлэх юм.
