Колумбын Hello Life ресторанд гэр бүлээрээ өглөөний цай ууж байсан үе эмгэнэлт явдлаар төгсжээ. Үйлчлэгч ширээн дээрх түлшээр ажилладаг галлуурыг дахин цэнэглэх гэж байгаад асаж байсан түлшийг зочин эмэгтэй рүү цацсан байна. Энэ талаар Need to Know мэдээлжээ.
57 настай Жанет Милен Суарес Сааведрагийн бие агшин зуур галд автаж, үс, нүүр, хүзүү болон хувцас нь шатжээ. Тэрээр биеийнхээ 70 орчим хувьд түлэгдэлт авч, 11 хоног эрчимт эмчилгээний тасагт амь тэмцсэн ч эцэст нь нас барсан байна.
Галыг унтраахаар Жанетийн нөхөр, Сокорро хотын даргад өмнө нь нэр дэвшиж байсан Хосе Луис Родригес болон хажуугийн ширээнд сууж байсан нэгэн эмэгтэй тусламж үзүүлжээ. Тэд хоёул түлэгдсэн байна. Родригесыг түлэнхийн тасгаас удалгүй эмнэлгээс гаргажээ.
Жанет тухайн үед ухаан санаатай байсан бөгөөд болсон явдал санамсаргүй тохиолдол гэдгийг эмч нарт хэлж амжсан байна. Мөн эмнэлэгт хүргэгдэхийнхээ өмнө эмч мэргэжилтэй хүүгээ дуудуулахыг хүссэн бөгөөд хүү нь түргэн тусламжийн баг ирэхээс өмнө очжээ.
Талийгаачийн төрөл садан Клаудиа Вега Сааведра радиод ярьснаар, рестораны ажилтан түлштэй дэнлүү барьж байсан бөгөөд ямар нэг зүйл буруугаар эргэсний дараа дэлбэрэлт болсон байна.
Үүний зэрэгцээ ресторан үйл ажиллагаагаа үргэлжлүүлсэн бөгөөд хэрэг явдал хэвлэлээр гарснаас хоёр хоногийн дараа л гэр бүлийнхэнтэй нь холбогджээ.
Hello Life-ийн зүгээс талийгаачийн ойр дотнын хүмүүст эмгэнэл илэрхийлж, болсон явдалд гүнээ харамсаж байгаагаа мэдэгдсэн байна. Мөн эрх баригчдад шаардлагатай бүх мэдээллийг өгөхөд бэлэн гэдгээ илэрхийлжээ.
