Өмнөд Солонгосын алдарт BTS хамтлаг “Arirang” нэртэй дэлхийг тойрох аялан тоглолтынхоо Хойд Америк дахь хэсгийг амжилттай өндөрлүүллээ. Тус хамтлаг 12 хотод нийт 31 тоглолт хийхэд бүх тасалбар бүрэн зарагдаж, 1.92 сая орчим үзэгч хамрагдсан байна. Аялан тоглолтын төгсгөл Лос-Анжелес хотын “SoFi Stadium”-д дөрвөн өдөр үргэлжилсэн тоглолтоор өндөрлөсөн бөгөөд уг тоглолтыг 282 мянган хүн биечлэн үзэж, 177 улс оронд шууд дамжуулан хүргэснийг “BigHit Music” агентлаг мэдээллээ.
SoFi Stadium-ийн түүхэн амжилт ба шүтэн бишрэгчдийн баяр
BTS хамтлаг өмнөх болон энэ удаагийн тоглолтуудаараа “SoFi Stadium” цэнгэлдэх хүрээлэнд нийт найман удаа тоглож, 496 мянга орчим үзэгч цуглуулсан нь тус байгууламжийн түүхэн дэх хамгийн өндөр үзүүлэлт болж шинэ дээд амжилт тогтоолоо. Тоглолтын үеэр шүтэн бишрэгчид нь Жонгүг болон есдүгээр сарын 12-нд төрсөн өдөр нь тохиох RM нарт зориулан төрсөн өдрийн дуу дуулж баярлуулсан юм. Түүнчлэн цэнгэлдэх хүрээлэнг тэдний “Golden” болон “Indigo” бие даасан цомгуудыг бэлгэдсэн алтлаг шар, цэнхэр өнгийн гэрлээр чимэглэсэн нь онцлог байв.
Аялан тоглолтын дараагийн зогсоол Өмнөд Америк
Хамтлагийн гишүүд аялан тоглолтынхоо хаалтын үеэр сэтгэгдлээ хуваалцахдаа, өнгөрүүлсэн мөч бүр нь аз жаргалтай байж, агшин зуур өнгөрсөн мэт санагдсаныг онцлоод хаана ч байсан шүтэн бишрэгчидтэйгээ үүрд холбоотой хэвээр байна гэдгээ илэрхийллээ. Долоон гишүүний бүрэлдэхүүнтэй тус хамтлаг одоо Өмнөд Америкийг чиглэн ажиллаж байгаа бөгөөд аравдугаар сарын 2-нд Колумбийн Богота хотоос эхлэн Лима, Сантьяго, Буэнос-Айрес, Сан-Пауло хотуудад аялан тоглолтоо үргэлжлүүлнэ.
