Цахим спортын HLTV портал 7-р сарын 20-ны байдлаарх CS2-ын дэлхийн шилдэг багуудын шинэчилсэн чансааг олон нийтэд танилцууллаа. Уг шинэчлэлтээр дэлхийн шилдэг багуудын байрлалд багагүй өөрчлөлт орсон байна.
Шилдэг багуудын эрэмбэ ба өөрчлөлтүүд
“IEM Cologne Major” тэмцээнд түрүүлснээс хойш нэг сар өнгөрч буй Falcons баг 902 оноотойгоор дэлхийн чансааг үргэлжлүүлэн манлайлж байна. Жагсаалтын эхний хэсэгт орсон багуудын эрэмбэ болон онооны үзүүлэлтийг дараах байдлаар танилцуулж байна.
- 2-р байр: Vitality (779 оноо)
- 3-р байр: FURIA (671 оноо) — Нэг байр ахиж шилдэг гуравт орлоо.
- 4-р байр: Spirit (669 оноо) — Дөрөвдүгээр байр руу ухрав.
- 5-р байр: NAVI (502 оноо) — Байрлал өөрчлөгдөөгүй.
Жагсаалтын үргэлжлэлд Өмнөд Америкийн 9z баг 370 оноогоор зургаадугаар байранд орсон бол долоодугаар байрыг Aurora (364 оноо), наймдугаар байрыг G2 (318 оноо) тус тус эзэлжээ. Мөн есдүгээр байранд BB Team (317 оноо) бичигдсэн бол Бразилын Legacy баг 233 оноогоор шилдэг 10 багийн жагсаалтыг хааж, MOUZ (207 оноо) багийг 11-р байр руу түлхсэн байна.
Монгол тоглогчид болон багуудын үзүүлэлт
Монгол тоглогчдын тухайд сонирхолтой үйл явдлууд шинэ чансаанд тэмдэглэгджээ. Тухайлбал, Александр “s1mple” Костылев болон Монголын хоёр тоглогч болох Senzu, Mzinho нарын тоглож буй BC.Game баг нэг дор 123 байр ухарч, чансааны 200-р байр руу унасан байна.
Харин манай The MongolZ баг чансаагаа нэг байраар ахиулж, одоогоор 15-р байранд бичигдэж эхэллээ. Тус баг “1xBet”-ийн дэмжлэгтэйгээр олон улсын тавцанд өндөр амжилт үзүүлэхийн төлөө үргэлжлүүлэн тэмцэж байна.
