Иргэний зориг ногоон намын Дүрмийн хороо 2026 оны 04 дүгээр сарын 22-ны өдөр хуралдаж, намын гишүүн Р.Батболдтой холбоотой асуудлыг хэлэлцэн шийдвэрлэсэн байна. Тус намын мэдээлснээр, дотоод ардчилал болон хууль дээдлэх зарчмыг хамгаалах хүрээнд түүнд сахилгын шийтгэл ногдуулж, улмаар намын гишүүнээс хасахаар шийдвэрлэжээ.
Хуралдааны үеэр Р.Батболдод холбогдох хэд хэдэн асуудлыг авч үзсэн талаар мэдээлсэн байна. Тодруулбал, Дүрмийн хорооноос түүнийг намын дотоод журам, удирдлагын бүтэцтэй холбоотой ноцтой зөрчил гаргасан гэж үзсэн аж.
ИЗНН-ын тайлбарласнаар, Р.Батболдод дараах үндэслэлүүдийг хамааруулан шийдвэр гаргасан байна.
- Намын дүрмийг ноцтой зөрчсөн
- Намын Их хурлын бүрэн эрхэд халдсан
- Баримт бичгийг хуурамчаар үйлдсэн
- Уг хууль бус, эрх зүйн хүчин төгөлдөр бус баримтыг Монгол Улсын Дээд шүүхэд хүргүүлсэн нөхцөл байдал тогтоогдсон
Ийнхүү Дүрмийн хороо дээрх нөхцөлүүдийг үндэслэн сахилгын шийтгэл ногдуулж, Р.Батболдыг намын гишүүнчлэлээс хасах шийдвэр гаргасан байна. Энэ нь ИЗНН-ын дотоод зохион байгуулалт, дүрмийн хэрэгжилттэй холбоотой маргааныг шинэ шатанд хүргэж буй үйл явдал болж байна.
