Байгаль орчин, уур амьсгалын өөрчлөлтийн сайдын тушаалаар түр зогсоогоод байсан “Туулын хурдны зам” төслийн ажлыг үргэлжлүүлэхээр болсон байна. Үүнтэй холбоотойгоор өнөөдөр /2026.04.20/ Байгаль орчин, уур амьсгалын өөрчлөлтийн сайд Ц.Сандаг-Очир, Төрийн нарийн бичгийн дарга Ш.Батбаяр нар нийслэлийн Засаг даргын орлогч Т.Даваадалай, Нийслэлийн Замын хөгжлийн газрын дарга Б.Одбаяр болон төслийн гүйцэтгэгч БНХАУ-ын хөрөнгө оруулалттай “Хаоюань женерал констракшн” ХХК-ийн төлөөлөлтэй гурван талт уулзалт хийжээ.
Уулзалтын үеэр Байгаль орчин, уур амьсгалын өөрчлөлтийн сайд Ц.Сандаг-Очир төслийн хэрэгжилтийг Монгол Улсын байгаль орчны хууль тогтоомжид бүрэн нийцүүлэн зохион байгуулах шаардлага тавьж, холбогдох байгууллагуудад тодорхой үүрэг, чиглэл өгсөн байна. Ингэснээр төслийг цаашид зөвхөн хууль, журмын хүрээнд хэрэгжүүлэх ёстой гэдгийг талуудад албан ёсоор сануулжээ.
Энэ үеэр Ц.Сандаг-Очир “Аливаа бүтээн байгуулалт Монгол Улсын хуульд захирагдана. Хуулиас дээгүүр төсөл гэж байхгүй. Байгаль орчин, иргэдийн эрх ашгийг зөрчсөн ямар ч үйл ажиллагааг төр хатуу зогсооно.
Төр хуулийг хэрэгжүүлэх үүргийнхээ хүрээнд төслийн үйл ажиллагааг зогсоосон. Цаашид төслийг Байгаль орчны нөлөөллийн үнэлгээ, тухайн жилийн байгаль орчны менежментийн төлөвлөгөөнд бүрэн нийцүүлж хэрэгжүүлнэ. Өмнө нь гарсан зөрчлийг арилгаж, байгаль орчинд учруулсан хохирлыг нөхөн төлүүлж, тайрсан бургасанд нөхөн төлбөр оногдуулна.
Хяналт шалгалтыг сулруулахгүй. Төслийн бүх үе шатанд байгаль орчны нөлөөллийг бууруулах арга хэмжээг хэрэгжүүлж, мониторингийг тогтмолжуулан, хоёр жил тутамд аудитын хяналт хийж ажиллана” хэмээн мэдэгдсэн байна.
Мөн Байгаль орчин, уур амьсгалын өөрчлөлтийн сайд Байгаль орчинд нөлөөлөх байдлын үнэлгээний тухай хуулийн 9 дүгээр зүйлийн 9.3, Байгаль орчин, аялал жуулчлалын сайдын 2019 оны аравдугаар сарын 29-ний өдрийн А/618 дугаар тушаалаар баталсан “Байгаль орчны менежментийн төлөвлөгөө боловсруулах, хянан батлах, тайлагнах журам”-ын 3.4-т заасныг үндэслэн “Туулын хурдны зам” төслийн 2026 оны байгаль орчны менежментийн төлөвлөгөөг хянан баталсныг мэдэгджээ.
Тодруулбал, “Байгаль орчны менежментийн төлөвлөгөө”-г батлуулаагүй байхад төслийн бүтээн байгуулалтын ажлыг эхлүүлсэн нь түр зогсоох шийдвэр гаргах үндэслэл болсон байна. Харин нийслэлийн удирдлагууд зөрчлөө хүлээн зөвшөөрч, богино хугацаанд шаардлагатай төлөвлөгөөг боловсруулан батлуулсан тул төслийн ажлыг үргэлжлүүлэх боломж бүрдсэн гэж үзжээ.
Уулзалтын төгсгөлд нийслэлийн Засаг даргын орлогч Т.Даваадалай, Нийслэлийн Замын хөгжлийн газрын дарга Б.Одбаяр нар төслийн хэрэгжилтийг байгаль орчны хууль тогтоомж болон холбогдох журамд бүрэн нийцүүлэн зохион байгуулах шаардлагыг хүлээн зөвшөөрсөн байна. Тэд цаашид төслийг зөвхөн хууль, журмын дагуу хэрэгжүүлнэ гэдгээ илэрхийлжээ.
- /2026.04.20/ гурван талт уулзалт болжээ
- “Туулын хурдны зам” төслийн 2026 оны байгаль орчны менежментийн төлөвлөгөөг баталсан байна
- Өмнөх зөрчил нь “Байгаль орчны менежментийн төлөвлөгөө”-г батлуулаагүй байхад ажлаа эхлүүлсэнтэй холбоотой байжээ
