“K-Pop Demon Hunters” төслийн хүчирхэг хоолой, дуучин, дуу зохиогч EJAE өөрийн карьерын эхэн үе буюу SM Entertainment-д дадлагажигч байхдаа авсан сэтгэлзүйн хүнд дарамтынхаа талаар анх удаа ам нээлээ. Саяхан оролцсон “And The Writer Is…” подкастын үеэр тэрээр 11-13 насандаа туулсан хатуу ширүүн туршлага нь өнөөдөр ч түүний амьдралд нөлөөлсөөр байгааг дурджээ.
Өсвөр насны эмзэг үедээ энтертайнмент ертөнцийн хатуу шүүлтүүрт орсон түүний ярианаас онцлох хэд хэдэн баримтыг дурдвал:
Биеийн жингийн дарамт: Долоо хоног бүр бусдын өмнө жингээ ил хэмжүүлдэг байсан бөгөөд 170 см өндөртэй түүнийг жин ихтэй байна хэмээн чанга дуугаар зарлаж, ичгүүрт байдалд оруулдаг байв.
Хатуу шүүмжлэл: Түүнийг бүжиглэж байхад “хүнд харагдаж байна” гэх мэтээр биеийн гадаад төрхийг нь байнга гоочилдог байжээ.
Ур чадварыг үгүйсгэх: Өдгөө дэлхийд танигдсан хоолойтой түүнийг хүүхэд байхад нь “муухай дуулж байна” гэх мэт үгээр сэтгэлзүйн хувьд мохоодог байсан байна.
EJAE-ийн хэлснээр, хүүхэд байхад нь хэлж байсан тэдгээр шүүлтүүргүй хатуу үгс нь өөртөө итгэх итгэлийг нь үгүй хийж, арилшгүй сэтгэлзүйн шарх үлдээжээ. Тэрээр амжилттай уран бүтээлч болсон хэдий ч дадлагажигч байхдаа мэдэрсэн ичгүүр, айдастайгаа тэмцэж, өнөөдрийг хүртэл сэтгэл заслын эмчилгээнд тогтмол хамрагдаж байгаагаа илэн далангүй хуваалцсан юм.
Энэхүү ярилцлага нь K-pop индустри дахь дадлагажигч нарын бэлтгэл сургуулилалтын явцад хүний эрх болон сэтгэлзүйн аюулгүй байдал ямар түвшинд байдгийг олон нийтэд дахин сануулсан үйл явдал боллоо. Өсвөр насны хүүхдийн төлөвшилд эерэг дэмжлэг хамгийн чухал байдаг ч EJAE-ийн хувьд энэ үе нь байнгын шүүмжлэл, дарамт дунд өнгөрсөн байна.
