НҮБ-ын Ерөнхий Ассамблей хүүхдийн, эрт болон албадан гэрлэлтийг халах Олон улсын өдрийг бий болголоо. Энэхүү өдрийг жил бүрийн 11 дүгээр сарын 27-ны өдөр тэмдэглэн өнгөрүүлж байхаар болсон талаар “Africanews” суваг мэдээлэв.
Уг тогтоолыг 9 дүгээр сарын 4-ний өдөр санал нэгтэйгээр баталсан байна. Сьерра-Леон улс уг санаачилгыг гаргаж, Кени, Руанда, Танзани, Уганда зэрэг 60 гаруй улс орон хамтран зохиогчоор оролцжээ.
Тогтоолд улс орнуудыг соён гэгээрүүлэх үйл ажиллагаа явуулах, эрт болон албадан гэрлэлтийн хохирогчдод тусламж үзүүлэх, буруутай этгээдүүдэд хариуцлага тооцохыг уриалсан байна. Мөн охидын боловсрол эзэмших боломжийг өргөжүүлэх, энэхүү практикийг арилгах үндэсний стратеги боловсруулахыг зөвлөжээ.
“Олон улсын өдөр өөрөө хүүхдийн гэрлэлтийг шууд зогсоож чадахгүй. Гэвч улс төрийн анхаарал, чанга хууль, үр дүнтэй байгууллагууд, боловсрол болон хамгийн гол нь тууштай улс төрийн зориг үүнийг хийж чадна” хэмээн тогтоолын төслийг танилцуулсан Сьерра-Леоны тэргүүн хатагтай Фатима Маада Био мэдэгдэв.
Статистик ба Тогтвортой хөгжлийн зорилт
НҮБ-ын Хүүхдийн сангийн (UNICEF) мэдээлснээр жил бүр 18 насанд хүрээгүй 12 сая орчим охин гэрлэдэг байна. Өдгөө амьдарч буй эмэгтэйчүүд болон охидын 650 сая орчим нь хүүхэд наснадаа гэрлэжээ.
Хүүхдийн, эрт ба албадан гэрлэлтийг халж зогсоох явдал нь НҮБ-аас 2030 он хүртэл хэрэгжүүлэх Тогтвортой хөгжлийн зорилтуудын нэгд багтаж байгаа юм.
