Монгол Улсын Ерөнхийлөгч Ухнаагийн Хүрэлсүх, Бүгд Найрамдах Тажикистан Улсын Ерөнхийлөгч Эмомали Рахмон нар албан ёсны хэлэлцээ хийлээ. Хоёр улсын төрийн тэргүүнүүд дипломат харилцааны 30 гаруй жилийн ололт амжилтыг дүгнэж, цаашдын хамтын ажиллагааг эдийн засаг, худалдааны шинэ агуулгаар баяжуулах тал дээр санал нэгдсэн юм.
Худалдаа, хөдөө аж ахуй ба бизнесийн салбарын хамтын ажиллагаа
Айлчлалын хүрээнд Монгол, Тажикистаны Бизнес дугуй ширээний уулзалтыг зохион байгуулж, Бизнесийн зөвлөл байгуулахаар болсон юм. Улмаар талууд Монголын “Алсын хараа-2050” бодлогыг Тажикистаны “2030 он хүртэлх Үндэсний хөгжлийн стратеги”-тай уялдуулан дараах тодорхой бүтээгдэхүүнүүдийг харилцан зах зээлдээ нийлүүлж эхлэхээр тохиролцлоо.
- Монголоос мах, ноос, ноолуур, арьс шир нийлүүлэх;
- Тажикистанаас төрөл бүрийн жимс, жимсгэнэ, нэхмэл эдлэл импортлох;
- Монголын ноос, ноолуурыг Тажикистаны хөвөн болон нэхмэлийн үйлдвэрлэлтэй хослуулан нэмүү өртөг шингэсэн хамтарсан бүтээгдэхүүн үйлдвэрлэх.
Зам тээвэр, эрчим хүчний салбар болон 11 баримт бичиг
Энэ удаагийн төрийн айлчлалаар худалдаа, эдийн засаг, боловсрол, геологи, ашигт малтмал, байгаль орчин, аж үйлдвэр зэрэг салбаруудыг хамарсан Засгийн газар болон байгууллага хоорондын нийт 11 баримт бичигт гарын үсэг зурлаа. Түүнчлэн дараах стратегийн ач холбогдолтой чиглэлүүдээр хамтран ажиллахаар болов.
- Усны эрчим хүч: Сэргээгдэх болон усны эрчим хүчээр Төв Азидаа тэргүүлдэг Тажикистантай туршлага солилцох, мэргэжилтэн бэлтгэх;
- Транзит тээвэр: “Транзит Монгол” болон Тажикистаны “Транзит улс” стратегийг уялдуулж, логистикийн дөт маршрут бий болгох;
- Бүс нутгийн хамтын ажиллагаа: Энэ оны есдүгээр сард Монголд болох “КАРЕК” хөтөлбөрийн Сайд нарын уулзалтад Тажикистаны талыг өндөр түвшинд оролцохыг урьсан юм.
Аялал жуулчлал болон боловсролын салбарын шинэ боломжууд
Төрийн тэргүүн нар Тажикистаны “Feel the friendship” брэндийг Монгол Улсын “Go Mongolia” брэндтэй уялдуулан аялал жуулчлалын хамтарсан төсөл хэрэгжүүлэхээр тогтлоо. Мөн Засгийн газрын тэтгэлэгт хөтөлбөрийн хүрээнд оюутан залуусыг харилцан сургах, ялангуяа мал аж ахуй, усны эрчим хүч, усжуулалтын чиглэлээр нарийн мэргэжлийн боловсон хүчин хамтран бэлтгэхээр санал нэгдсэн байна.
