Канад улсын засгийн газар 2026 оны хоёрдугаар сарын 4-ний Лхагва гаригаас эхлэн ОХУ-ын нутаг дэвсгэр дээр виз мэдүүлэг хүлээн авахаа бүрэн зогсоох шийдвэр гаргав. Уг гэнэтийн шийдвэр ямар шалтгаанаар гарсан, мөн хэр удаан үргэлжлэх нь одоогоор тодорхойгүй байгаа бөгөөд Канадын тал албан ёсны тайлбар хараахан өгөөгүй байна.
Өмнө нь Оросын иргэд Москва, Санкт-Петербург, Владивосток зэрэг томоохон зургаан хотод виз мэдүүлэх боломжтой байсан бол одоо нөхцөл байдал өөрчлөгдөж, тэд гадаад улсыг зорихоос өөр аргагүй болжээ.
Оросын иргэдэд тулгарч буй шинэ нөхцөл байдал:
- Виз мэдүүлэх цэгүүд: Оросын иргэд Канадын виз мэдүүлэхийн тулд Казахстан, Армени эсвэл Гүрж зэрэг хөрш орнууд дахь визийн төвүүдэд биеэр очих шаардлагатай болж байна.
- Беларусь улс: Беларусьт Канадын визийн төв байдаггүй тул тус улсын иргэд мөн адил гуравдагч орныг зорих шаардлага тулгарч байна.
- ДАШТ-ийн хязгаарлалт: 2026 оны Хөлбөмбөгийн ДАШТ-ийг Канад улс АНУ болон Мексиктэй хамтран зохион байгуулах бөгөөд энэ үеэр спортын арга хэмжээг ашиглан орогнол хүсэж болзошгүй иргэдэд виз олгохгүй байх, хил дээр нэвтрүүлэхгүй байх хатуу байр суурь баримтлахаа Цагаачлалын яамнаас нь анхааруулаад байгаа юм.
Канад улс нь 2022 онд Украин руу хийсэн ОХУ-ын довтолгооноос хойш тус улсын эсрэг эдийн засаг болон дипломат хориг арга хэмжээг тууштай хэрэгжүүлж буй орнуудын нэг билээ. ОХУ дахь визийн үйлчилгээг зогсоосон нь эдгээр хориг арга хэмжээний үргэлжлэл үү, эсвэл цэвэр техникийн болон аюулгүй байдлын шалтгаантай юу гэдэг нь удахгүй тодорхой болох биз ээ.
