Японы улс төрийн тавцанд томоохон өөрчлөлт гарах магадлалтайг “Asahi Shimbun” сониноос явуулсан хамгийн сүүлийн үеийн судалгаа харууллаа. Тус улсын Ерөнхий сайд Такаичи Санаэгийн тэргүүлсэн Либерал ардчилсан нам болон “Японыг шинэчлэх нийгэмлэг” намын эвсэл ирэх ээлжит бус сонгуулиар парламентын доод танхимын 465 суудлаас 300 орчмыг нь өөрийн болгож, байр сууриа үлэмж бэхжүүлэх төлөвтэй байна. Өдгөө тус эвсэл 233 суудалтай байгаа бол энэ удаагийн санал хураалтаар суудлын тоогоо ийнхүү мэдэгдэхүйц нэмэгдүүлж, хууль тогтоох байгууллагад дийлэнх олонх болох боломж бүрджээ.
Энэхүү судалгааны үр дүнгээс харахад эрх баригч эвсэл сонгогчдын саналын гуравны хоёрыг буюу 310 хүртэлх суудал авах магадлалтай байгаа нь төсөв батлах болон Ерөнхий сайдыг сонгох зэрэг шийдвэрлэх үйл явцад тэдэнд давуу байдал олгох юм. Нөгөө талд сөрөг хүчний намуудын хувьд нөхцөл байдал хүндэрч, одоо байгаа 167 суудлынхаа 74-ийг алдах таамаг гарчээ. Харин хэт консерватив үзэлтэй намууд одоогийн хоёр суудлаа 11 болгож ахиулах магадлал өндөр байна.
“Asahi Shimbun” сонин энэхүү тандалтыг нэгдүгээр сарын 31-нээс хоёрдугаар сарын 1-ний хооронд зохион байгуулсан бөгөөд судалгаанд нийт 350 мянга орчим иргэн хамрагджээ. Японы парламентын доод танхимын ээлжит бус сонгуулийн санал хураалт энэ сарын 8-ны өдөр болох бөгөөд орон нутгийн хэвлэлүүд Либерал ардчилсан намыг дангаараа олонх болж, засаг барих эрхээ хадгалж үлдэнэ гэж үзэж байна.
