Монголын ахмадын холбооноос өнөөдөр /2026.01.27/ мэдээлэл хийж, тэтгэврийн шинэчлэл болон ахмадын амьжиргааны асуудлаар эрс мэдэгдэл гаргалаа. Тэд төр засгийн зүгээс ахмадуудынхаа нийгмийн баталгааг үл тоомсорлож буйд бухимдаж, сануулга тэмцлээс орон даяар өрнөх томоохон жагсаал руу шилжихээ зарлав. Ялангуяа сар шинийн баяр дөхөж буй энэ үед үнийн хөөрөгдөл ахмадуудын хувьд туйлын хүнд сорилт болоод байгааг онцлов.
Ахмадуудын тавьж буй гол шаардлага болон шүүмжлэлийг тоймловол:
- Тэтгэврийн доод босго: Тэтгэврийн доод хэмжээг яаралтай нэг сая 500 мянган төгрөгт хүргэхийг шаардаж байна. Одоогийн 500–600 мянган төгрөгийн тэтгэвэр амьжиргаанд хүрэлцэхгүй байгааг тэд хэллээ.
- Байгалийн баялгийн хуваарилалт: “Оюутолгой” зэрэг мега төслүүдээс орж ирж буй асар их ашгийг ахмадуудын нийгмийн хамгаалалд зарцуулахыг уриаллаа. Австрали зэрэг орны ахмадууд баялгаасаа хүртэж аялдаг бол Монгол ахмадууд яагаад ийм боломжгүй байгааг асууж байна.
- Банкны мөлжлөгийг зогсоох: Тэтгэврийн зээлийн хүүг тэглэж, арилжааны банкуудыг баяжуулдаг 36 сарын хугацаатай, өндөр суутгалтай зээлийн тогтолцоог халахыг шаардав.
- Тэмцлийн хурц хэлбэр: 2025 оны тавдугаар сараас хойш үргэлжилж буй тэдний тэмцэлд төр засаг хариу өгөхгүй бол олон улсын хүний эрхийн байгууллагад хандахаар зэхэж байна.
Монголын ахмадын холбооны гишүүн н.Батбаяр төр засгийн удирдлагуудын үг, үйлдэл зөрж буйг хатуу шүүмжилсэн юм. Ерөнхий сайд Г.Занданшатар гадаадад улсаа “Баян орон” гэж сурталчилдаг хэрнээ ахмадынхаа тэтгэврийг нэмэх боломжгүй гэж байгаа нь логикгүй алхам гэдгийг тэрбээр сануулав. Нийслэлийн 9 дүүрэг, 21 аймаг, 330 сумын ахмадууд нэгдэж, УИХ-ын дарга Н.Учрал болон Гүйцэтгэх засаглалын тэргүүнд албан шаардлагаа хүргүүлээд байгаа ажээ.
Тэтгэвэр авагчдын 40 хувийг банкууд суутгаж байгаа нь ахмадуудын эрхийг ноцтой зөрчиж байгаа тул энэ тогтолцоог нэн даруй засахгүй бол ахмадууд бууж өгөхгүй гэдгээ илэрхийлэв. Есөн сарын турш хариу хүлээсэн тэд одоо илүү идэвхтэй, хурц хэлбэрээр эрхийнхээ төлөө тэмцэхээр нэгджээ.
