Е витамин бол эсүүдийг хамгаалагч гол антиоксидант юм. Үүний дутагдал нь булчин сулрах, хөдөлгөөний баримжаа алдагдах, дархлааны систем ноцтой хямрахад хүргэдэг байна. The Mirror хэвлэлд мэдээлснээр, хүмүүс ихэвчлэн С витамин эсвэл төмрийн хэрэглээнд анхаардаг боловч Е витамины ач холбогдлыг орхигдуулах талтай байдаг аж.
Е витамины биед гүйцэтгэх үүрэг
Кливленд клиникийн мэргэжилтнүүдийн тайлбарлаж буйгаар Е витамин нь эсийг чөлөөт радикалаас хамгаалдаг. Чөлөөт радикалууд нь эсийг гэмтээж болох химийн урвалууд бөгөөд Е витамин хангалтгүй үед дархлааны систем өвчин, халдвартай тэмцэх чадвараа алддаг. Мөн энэ витамин нь:
- Арьсны эрүүл мэндийг дэмждэг;
- Харааг хамгаалдаг;
- Цусны бүлэгнэл үүсэхээс сэргийлдэг;
- Үрэвслийг намдаадаг ач холбогдолтой.
Е витамины дутагдлын шинж тэмдэг
Е витамины дутагдал нь юуны түрүүнд мэдрэлийн систем болон булчинд нөлөөлдөг. Гол шинж тэмдгүүдэд булчин сулрах, орон зайн баримжаа алдагдах, ядрах, гар хөл бадайрах зэрэг орно. Хамгийн аюултай үр дагавар нь хараагүй болох эрсдэл юм. Бусад шинж тэмдгүүд:
- Гемолитик анеми (цусны өвчин);
- Рефлекс удаашрах;
- Алхахад хүндрэлтэй болох;
- Дархлаа сулрах.
Дутагдалд орох шалтгаан ба эрсдэлт бүлэг
Ихэнх тохиолдолд Е витамины дутагдал нь хоол хүнснээс бус, харин бие махбодь өөх тосыг шингээж чадахгүй байхтай холбоотой байдаг. Учир нь Е витамин нь тосонд уусдаг витамин тул хоол хүнсэнд хангалттай хэмжээний өөх тос байхгүй бол биед шингэдэггүй. Дутагдалд орох гол шалтгаанууд:
- Элэгний өвчлөл, нойр булчирхайн үрэвсэл;
- Кроны өвчин, целиаки (цавуулаг үл тэвчих);
- Дутуу төрсөн нярай хүүхдүүд (эхээс ургийн шатанд маш бага хэмжээний Е витамин дамждаг).
Хэрэв танд дээрх шинж тэмдгүүд илэрч байвал мэргэжлийн эмчид хандаж, шинжилгээ өгөх хэрэгтэйг мэргэжилтнүүд зөвлөж байна.
