Холливудын алдарт жүжигчин Микки Руркийн сүүлийн үеийн гэрэл зургууд олон нийтийн сүлжээнд ихээхэн шуугиан тарьж байна. Daily Mail хэвлэлийн папарацциуд түүнийг гэрийнхээ гадаа хоолны хүргэлт авч байх үед нь дурандаа буулгасан бөгөөд эдгээр зургууд дээр жүжигчнийг танихын аргагүй болсон байсан нь шүтэн бишрэгчдийг нь түгшээгээд байгаа юм.
Жүжигчин маш их жин хасаж, цонхигор харагдах болсноос гадна өөрийн өтгөн үсээ бүрмөсөн хусаж, халзан болсон байна. Хэвлэлийнхэн жүжигчний төлөөлөгчдөөс тайлбар хүссэн боловч одоогоор ямар нэгэн албан ёсны хариу өгөөгүй байна.
Холливудын хамгийн царайлаг эрчүүдийн нэгд тооцогддог байсан түүний ийнхүү өөрчлөгдсөн шалтгааныг ойрын эх сурвалж нь түүний өнгөрсөн амьдралын хэв маягтай холбон тайлбарлажээ. Микки олон жилийн турш “рок од” шиг амьдарч, согтууруулах ундаа болон мансууруулах бодис хэтрүүлэн хэрэглэж ирсэн нь түүний гадаад төрхөнд нөлөөлсөн гэж инсайдер мэдээлсэн байна.
Үүнээс гадна олон удаагийн гоо сайхны хагалгаа нь түүний төрхөнд гүн мөрөө үлдээсэн бөгөөд Холливудын киноны нүүр хувиргалтгүйгээр түүнийг бодит байдал дээр ийм байдалтай харах нь гайхах зүйл биш гэдгийг эх сурвалж онцолжээ. Микки Рурк одоо 73 настай бөгөөд саяхан байрны түрээсийн өр төлбөрөөсөө болж гэрээсээ хөөгдөх аюулд орсон тул хандив цуглуулж эхэлсэн билээ.
