Ирэх онд Био комбинатын гүүрнээс Эмээлтийн авто зам хүртэл 12.5 км урттай шинэ авто зам барихаар төлөвлөжээ. Энэхүү бүтээн байгуулалтын ажилтай холбогдуулан Зам тээврийн сайд Б.Дэлгэрсайхан, Нийслэлийн Засаг даргын Эдийн засгийн хөгжил, дэд бүтцийн асуудал хариуцсан орлогч Т.Даваадалай болон холбогдох албан тушаалтнууд уг авто замын трасст газар дээр нь очиж ажилласан байна.
Төмөр замыг хотоос гаргах төлөвлөгөө
Зам тээврийн сайд Б.Дэлгэрсайхан төмөр замын төслүүдийн талаар мэдээлэл өгөхдөө:
- Өнгөрсөн оны эхээр “Монголын төмөр зам ТӨХК” болон “Улаанбаатар төмөр зам ХНН”-ийн төмөр замыг нийслэл хотоос гаргах тухай Засгийн газрын шийдвэр гарсан.
- Үүний дагуу Багахангай дүүргээс Хөшигийн хөндийн нисэх онгоцны буудал хүртэл 102 км урттай салаа төмөр зам барих ажлын далангийн дэд бүтцийн бүтээн байгуулалтыг эхлүүлсэн.
- Цаашид уг төмөр замыг Хөшигийн хөндийн нэгдүгээр өртөөнөөс Толгойт өртөө болон Эмээлт орчим хүртэл холбохоор төлөвлөж байна.
- Энэхүү төлөвлөгөө нь ДЦС-3, ДЦС-4-ийн нүүрсний тээвэрт ашигладаг төмөр замыг хэвээр үлдээх зорилготой тул шинэ замыг хот руу бага зэрэг ойртуулж байгаа юм.
Сайд Б.Дэлгэрсайхан төмөр замын бүтээн байгуулалтын ажил ирэх хавар эхлэхээс өмнө нийслэлээс газар чөлөөлөлтийг хийж өгөхийг хүссэн. Уг төмөр зам баригдсанаар Улаанбаатар хотыг дайран өнгөрч буй ачаа тээврийг хотоос гаргах, тэр дундаа 34 нэр төрлийн аюултай ачааг хотын төвөөр бус, гадуур явуулах боломж нээгдэнэ гэдгийг онцлон тэмдэглэсэн.
Шинэ авто замын төсөл
Нийслэлийн Зам, хөгжлийн газрын дарга Б.Одбаяр авто замын ажлын талаар мэдээлэхдээ: Ирэх онд нийслэлийн төсвийн хөрөнгөөр хийх хамгийн гол төслүүдийн нэг нь Био комбинатын гүүрнээс Эмээлтийн авто зам хүртэлх 12.5 км тусгай зориулалтын зам юм.
- Энэхүү зам нь хоёр эгнээтэй байх юм.
- Бүтээн байгуулалтын ажлыг 2026 оны дөрөвдүгээр сараас эхлүүлнэ.
- Тус ондоо багтаан ашиглалтад оруулахаар төлөвлөжээ.
Нийслэлийн Засаг даргын нэгдүгээр орлогч Т.Даваадалай шинэ зам, төмөр замын ач холбогдлыг тодотгохдоо, Хүннү хотод Улаанбаатар хотын тээвэр, логистикийн нэгдсэн төвийг шинээр барих ажлыг эхлүүлнэ гэв. Энэхүү төсөл хэрэгжсэнээр нийслэлийн төвлөрөл саарч, түгжрэл буурах, хот дундуур дайран өнгөрч буй төмөр замын эрсдэл буурах боломж бүрдэнэ. Түүнчлэн шинэ авто зам ашиглалтад орсноор Хүннү хотыг богино хугацаанд барьж байгуулах дэд бүтцийн суурь тавигдах давуу талтайг дурдсан.
