Нийслэлийн Боловсролын газраас энэ онд боловсролын дэд бүтцийг нэмэгдүүлэх зорилгоор нийт 139 төсөл, арга хэмжээг эхлүүлээд байна. Үүнд 43 ерөнхий боловсролын сургууль, 67 цэцэрлэг, 22 бага сургууль, цэцэрлэгийн цогцолбор зэрэг барилга, байгууламж багтаж байгаа бөгөөд санхүүжилтийг улс, нийслэл, дүүргийн төсөв болон гадаадын зээл, тусламжийн эх үүсвэрээс бүрдүүлж байна.
2025 онд ашиглалтад оруулахаар төлөвлөсөн шинэ сургуулиуд, цэцэрлэгүүдийн хүчин чадлыг тооцоолж, хүүхдийн ачааллыг бууруулах бодлого хэрэгжүүлж байна. Төлөвлөгөөний дагуу:
- 8 080 сурагчийн суудалтай 12 сургууль
- 3 930 орны хүчин чадалтай 24 цэцэрлэг
- 3 080 хүүхэд хүлээн авах боломжтой 11 бага сургууль, цэцэрлэгийн цогцолбор
нийгэмд шилжихээр тооцож байна. Ингэснээр сургуулийн хэт ачааллыг багасгаж, цэцэрлэгийн хүртээмжийг нэмэгдүүлэх чухал алхам болох юм.
Өнөөдрийн байдлаар боловсролын шинэ барилга байгууламжийн тодорхой хэсгийг аль хэдийн ашиглалтад оруулжээ. Үүнд долоон сургууль, 19 цэцэрлэг, долоон бага сургууль, цэцэрлэгийн цогцолбор, нэг спорт заал багтдаг. Үлдсэн барилгуудын ажлыг эрчимжүүлж, энэ онд багтаан дараах объектыг ашиглалтад хүлээн авах төлөвтэй байна.
- 5 сургууль
- 5 цэцэрлэг
- 4 бага сургууль, цэцэрлэгийн цогцолбор
- 1 спорт заал
Ийнхүү 2025 оны төгсгөл гэхэд нийслэлийн хэмжээнд хэд хэдэн шинэ сургууль, цэцэрлэг ашиглалтад орсноор олон мянган хүүхэд стандартын шаардлага хангасан орчинд суралцаж, хүмүүжих боломж бүрдэхээр байна.
