Москва хотод хийсэн уулзалтын эхэнд Ерөнхий сайд Г.Занданшатар Монгол, Орос хоёрын олон жилийн турш бүрэлдсэн найрсаг, хөршийн харилцааг үл тасрах уламжлал гэж үнэлэв. Мөн энэ түншлэлийг гүнзгийрүүлэн өргөжүүлэх нь Монгол Улсын гадаад бодлогын тэргүүлэх чиглэлийн нэг гэдгийг онцолж, иж бүрэн стратегийн түншлэлийг шинэ агуулгаар баяжуулж, улс төрийн итгэлцлийг баталгаажуулах эрмэлзлээ илэрхийлэв.
Харин ОХУ-ын Ерөнхийлөгч В.В.Путин хоёр улсын дээд, өндөр түвшний уулзалт, айлчлал тогтмолжиж, төрийн тэргүүн нарын хүрээнд хэлэлцэн тохирсон олон санаачилга үе шаттай хэрэгжиж байгааг тэмдэглэв. Тэрбээр хамтын ажиллагааг цаашид улам эрчимжүүлэхийн тулд хоёр тал бодит төслүүдийг дэмжиж, уялдаатай ажиллах нь чухал гэж дурдлаа.
Хэлэлцээний үеэр дараах томоохон төслийн хэрэгжилтэд онцгой анхаарал хандуулахаар талууд байр сууриа нэгтгэв.
- Монгол Улсын нутаг дэвсгэрээр дамжин ОХУ-аас БНХАУ руу байгалийн хий дамжуулах хоолой барих төсөл
- “Монгол-Орос-Хятадын Эдийн засгийн коридор байгуулах хөтөлбөр”-ийн хүрээнд дэд бүтэц, тээвэр, ложистикийн хамтын ажиллагааг өргөжүүлэх
Мөн Монгол Улс, ОХУ хоёр 2026 онд дипломат харилцаа тогтоосны 105 жилийн ойг хамтран өргөн хүрээнд тэмдэглэн өнгөрүүлэхээр тохиролцов. Тус ойг хоёр орны ард түмний найрамдал, хамтын түүхийг эргэн дүгнэж, шинэ хамтын ажиллагааны төсөл, санаачилгаар баяжуулсан арга хэмжээ болохоор төлөвлөж байна.
Ерөнхий сайд Г.Занданшатар өмнө нь өнгөрсөн есдүгээр сард Владивостокт болсон Дорнын эдийн засгийн 10 дугаар чуулга уулзалтад оролцох үеэрээ В.В.Путин Ерөнхийлөгчид мөн бараалхсан билээ. Тэрээр ийнхүү мягмар гарагт (2025.11.18) ШХАБ-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд оролцох үеэр ОХУ-ын төрийн тэргүүнтэй дахин уулзаж, өмнөх ярилцлага, тохиролцоонуудын хэрэгжилтийн явцыг үргэлжлүүлэн хэлэлцлээ.
