2025 оны 11-р сарын 7-нд “Оюу толгой” компани 2025–2026 оны хичээлийн жилийн дотоодын тэтгэлэгт хөтөлбөрт шалгарсан 60 шилдэг оюутанд батламжийг нь гардууллаа.
Энэ жил тэтгэлэг хоёр чиглэлээр олгогдсон. Үүнд:
- Дотоодын тэтгэлэгт хөтөлбөр (2011 оноос): 30 оюутан
- Ажилтнуудын хүүхдэд зориулсан хөтөлбөр (2024 оноос): 30 оюутан
Ингэснээр “Оюу толгой” компани байгуулагдсанаас хойш нийт 1,375 оюутанд дотоод, гадаадад суралцах сургалтын тэтгэлэг олгож, залуусын боловсролд бодит дэмжлэг үзүүлээд байна.
Боловсон хүчин, бүтэц зохион байгуулалт хариуцсан Ерөнхий менежер Лори Ирвин батламж гардуулах ёслолын үеэр:
“Манай тэтгэлэгт хөтөлбөр 14 дэх жилдээ үргэлжилж байна. Сургалтын төлбөр, сарын тэтгэмж, дотуур байрны зардлыг бүрэн даахаас гадна оюутнуудад хөгжлийн хөтөлбөрт оролцох боломж олгодог. Энэ жил 18 төрлийн мэргэжлээр суралцаж буй залуус шалгарлаа” хэмээн онцоллоо.
2010 оноос хойш “Оюу толгой” боловсролын салбарт нийт 152 гаруй сая ам.доллар зарцуулж, мянга гаруй залуусыг дээд боловсролтой, чадварлаг мэргэжилтэн болон төлөвшихөд хувь нэмэр оруулжээ.
Оюутан, залуусыг дэмжих бусад хөтөлбөрүүд
“Оюу толгой” дотоодын тэтгэлгээс гадна дараах олон талт боломжуудыг олгодог:
- Гадаадын тэтгэлэгт хөтөлбөр: Дэлхийн шилдэг их сургуулиудад уул уурхайн чиглэлээр суралцахад санхүүгийн дэмжлэг олгоно.
- “Говийн оюу” тэтгэлэг: Өмнөговийн залуус орон нутагт шаардлагатай мэргэжлээр суралцахад сургалтын төлбөрийг бүрэн хариуцдаг.
- Шинэ төгсөгчийн хөгжлийн хөтөлбөр: Дөнгөж төгссөн залууст 2 жилийн турш мэргэжлийн ур чадвараа хөгжүүлэх боломж бий болгоно.
- Дадлагажигч оюутан хөтөлбөр: Мэргэжлийн дагуу цалинтай дадлага хийх орчин бүрдүүлдэг.
- Залуусын хөгжлийн хөтөлбөр: Ахлах ангийн сурагчдад ур чадвараа хөгжүүлэх хөтөлбөр.
Эдгээр хөтөлбөрүүд нь Монголын залуу үеийн боловсрол, хөгжил, ирээдүйд томоохон хөрөнгө оруулалт болж, олон мэргэжилтэн, ирээдүйн манлайлагчдыг бэлтгэхэд түлхэц болж байна.
Дэлгэрэнгүй мэдээллийг: www.ot.mn
