Цөлжилтийн эсрэг Монголын eSport багийн санаачилга
Цахим спортын “The MongolZ” баг Монгол орны цөлжилттэй бүс нутагт 100 мянган хайлаас мод тарих экологи, нийгмийн ач холбогдолтой төслийг хэрэгжүүлж байна. Тэд “Шамбала Инженеринг Кампус” компанитай хамтран Дорноговь аймгийн Эрдэнэ сумын Ар цацын ус орчимд “The MongolZ #1” нэртэй төгөл байгуулах юм.
Багийнхан өнгөрсөн дөрөвдүгээр сард уг санаачилгыг зарлаж байсан бол саяхан “Амлалтаа биелүүлэхээр зорьж байна, бэлтгэл ажил ид дундаа” хэмээх мэдээгээ нийтэлжээ.
Байгаль хамгаалалд хувь нэмэр оруулсан шинэлэг төсөл
“The MongolZ” багийн төгөлд тарьж буй тарваган хайлаас (Ulmus pumila) нь говийн хуурай, эрс тэс уур амьсгалд тэсвэртэй мод бөгөөд 8–12 метр өндөр ургаж, 100–200 жил насалдаг байна. Төслийн хүрээнд мод худалдан авсан хүн бүр өөрийн нэрийн модны гэрчилгээ, жил бүрийн ургалтын тайлан, зураг авах эрхтэй байх аж.
Моддын арчилгаа, усалгаа, нөхөн тарилт, хяналт хамгаалалтыг мэргэжлийн баг таван жилийн хугацаанд гүйцэтгэнэ.
Энэхүү “The MongolZ #1” төгөл нь сансраас хүртэл харагдахуйц байгальд ээлтэй бүтээн байгуулалт байх бөгөөд Зүүн Азийн хэмжээнд газар авч буй түйрэн, цөлжилтийн эсрэг тэмцэлд бодит хувь нэмэр оруулах зорилготой юм.
Одоогоор “The MongolZ” багийнхан Хятадын Чэндү хотод 11 дүгээр сарын 3–9-нд болох “IEM Chengdu 2025” тэмцээнд оролцохоор бэлтгэлээ хангаж байна.
