Монгол Улс гадаад худалдааны тээврийн шинэ гарцтай боллоо. 2025 оны аравдугаар сарын 22-нд Монгол Улсын Далайн захиргааны дарга М.Өлзий, БНСУ-ын Пусан хотын Боомтын захиргааны захирал Сун Сан Гын нар Пусаны олон улсын боомтыг Монгол Улс руу албан ёсоор нээх тухай санамж бичигт гарын үсэг зурлаа.
Энэхүү санамж бичгийн үр дүнд Монгол Улс анх удаа БНСУ-ын Пусан боомтоор дамжин гадаад далайд худалдааны шинэ гарцтай болж байна. Энэ нь:
- Монгол Улсаас Америк болон Европ руу чиглэсэн ачааг илүү хурдан, үр ашигтай тээвэрлэх,
- Гуравдагч орноос ирсэн чингэлэгтэй ачааг Монгол руу түргэн шуурхай хүргэх,
- БНСУ-ын өмнөд бүсийн бараа бүтээгдэхүүнийг богино хугацаанд тээвэрлэх зэрэг олон талын ач холбогдолтой юм.
Хамтын ажиллагааны хүрээ
Санамж бичигт зөвхөн тээвэрлэлтийн чиглэл бус дараах чиглэлүүдийг ч хамруулжээ:
- Ухаалаг болон дижитал боомтын систем нэвтрүүлэх
- Нүүрстөрөгчийн ялгарал багатай “ногоон боомт” байгуулах
- Олон төрлийн тээврийн сүлжээг хөгжүүлэх
- Боомтын үйл ажиллагаа болон хүний нөөцийн чадавхыг сайжруулах
Энэ нь Монгол Улсад логистикийн дэд бүтцийг сайжруулах, олон улсын худалдаанд өрсөлдөх чадварыг нэмэгдүүлэх стратегийн чухал алхам гэж үзэж байна.
Пусаны боомтын дэлхийн байр суурь
Пусан боомт нь дэлхийд:
- дамжин тээвэрлэлтийн үзүүлэлтээр 2-т,
- чингэлэг эргэлтийн хэмжээгээр 6-т ордог бөгөөд
150 гаруй улсын 500 гаруй боомттой холбогддог. Жил бүр 400 сая тонн ачаа эргэлт хийдэг дэлхийн хамгийн том боомтуудын нэг юм.
Монгол Улсаас БНСУ-ын Пусан хотод суугаа Консул Ц.Жадамбаа 2025 оны долдугаар сард Пусан боомтын захиралтай уулзаж, шууд тээвэрлэлтийг эхлүүлэх талаар санал тавьсан нь өнөөдрийн энэхүү санамж бичиг байгуулах гол үндэс болсон байна.
