Багш нарын хугацаагүй ажил хаялт эхэлсний дараа эмч, эмнэлгийн ажилтнууд ч мөн цалин нэмэх шаардлагатай гэж үзэн Төв талбайд жагсаж эхэллээ. Тэдний гол шаардлага нь — салбарынхаа онцгой ачаалал, хариуцлагад нийцсэн цалингийн нэмэгдэл хэрэгжүүлэх юм.
Засгийн газрын шийдвэр ба эмч нарын байр суурь
Долоо хоногийн өмнө Засгийн газрын хуралдаанаар эмч, эмнэлгийн ажилтнуудын үндсэн цалинг 15 хувиар нэмэгдүүлэх шийдвэр гарсан. Энэ талаар Эрүүл мэндийн сайд Ж.Чинбүрэн дараах байр суурийг илэрхийлжээ.
“Эрүүл мэндийн байгууллагын албан хаагчдын үндсэн цалингийн 15 хувийн нэмэгдэлд 181 тэрбум төгрөг шаардлагатай. Манай салбарын дундаж цалин боловсролын салбартай харьцуулахад арай өндөр байгаа учраас 20 бус 15 хувь нэмэх нь зүйтэй гэж үзсэн. Эмч нар ажилласан жилээсээ шалтгаалж өөр өөр цалин авч байгаа.
1–4 жил ажилласан эмч 1.8–2.5 сая, 5–10 жил ажилласан эмч 2.5–3 сая, 10 жилээс дээш ажилласан эмч 3–3.5 сая төгрөгийн цалин авдаг. Энэ нь жижүүрийн нэмэгдэлтэй нийлсэн дүн юм.”
Гэвч эмч, эмнэлгийн ажилтнуудын зүгээс бодит байдал үүнээс илүү хүндрэлтэй байгаа бөгөөд “15 хувийн нэмэгдэл нь амьжиргаанд хүрэлцэхгүй, шударга нэмэгдэл биш” гэж мэдэгдсэн байна.
Жагсаал зургаа дахь өдрөө үргэлжилж байна
Монголын эрүүл мэндийн ажилтны үйлдвэрчний эвлэлийн холбооны мэдээлснээр өнөөдрийн байдлаар 21 аймаг болон нийслэлийн 1000 гаруй эмч, ажилтан жагсаалд оролцож байна.
Тэд энэ сарын 9-нд Засгийн газарт шаардлага хүргүүлсэн бөгөөд өнөөдөр (10-р сарын 23) 13:00 цагаас өмнө хариу ирэх хүлээлттэй байгаа аж. Хэрэв шаардлагыг хүлээж авахгүй бол сонирхлын маргаан үүсгэх, энэ нь үр дүнгүй бол хугацаагүй ажил хаялт зарлах болно гэж мэдэгдлээ.
Байдал хурцдах эрсдэлтэй байна
Эмч, эмнэлгийн ажилтнууд цалин нэмэх асуудлыг нэн тэргүүнд шийдэхийг шаардаж, “иргэдэд үзүүлэх эмнэлгийн үйлчилгээ доголдох хэмжээнд хүргэхийг хүсэхгүй байна, гэхдээ бидний хөдөлмөрийг бодитоор үнэлэх ёстой” гэж мэдэгдэв.
