Лос-Анжелесийн шүүхийн тангарагтны шүүгчид Johnson & Johnson (J&J) компанийг талктай хүүхдийн нунтагнаас үүдэлтэй хорт хавдрын хэрэгт 966 сая ам.доллар төлөх шийдвэр гаргасан тухай Reuters мэдээллээ.
Калифорнийн оршин суугч Мэй Мур (88 настай) 2021 онд нас барсны дараа түүний гэр бүл компаниас шүүхэд нэхэмжлэл гаргасан байна. Тэдний мэдэгдэлд дурдсанаар, J&J-ийн үйлдвэрлэсэн талктай хүүхдийн нунтагт асбестын ширхэг агуулагдаж, энэ нь ховор төрлийн хорт хавдар үүсгэсэн гэжээ.
Шүүхийн шийдвэрийн дагуу гэр бүлд 16 сая ам.доллар нөхөн төлбөр, харин компанид 950 сая ам.долларын торгууль ногдуулжээ.
Johnson & Johnson шийдвэрийг эсэргүүцэж байна
Компанийн төлөөлөгч уг шийдвэрийг “хууль бус ба шударга бус” гэж мэдэгдээд, нэн даруй давж заалдах бодолтой байгаагаа илэрхийлэв.
J&J-ийн хууль эрх зүйн асуудал хариуцсан дэд ерөнхийлөгч Эрик Хаас “гэр бүлийн өмгөөлөгчид шинжлэх ухааны үндэслэлгүй нотолгоонд тулгуурласан” гэж мэдэгдсэн. Түүний хэлснээр, компанийн бүтээгдэхүүн аюулгүй, асбест агуулаагүй, мөн хорт хавдар үүсгэдэггүй аж.
2020 онд J&J компани АНУ-д талктай хүүхдийн нунтаг үйлдвэрлэл, худалдаагаа зогсоож, эрдэнэ шишийн цардуул дээр суурилсан шинэ бүтээгдэхүүнээр орлуулсан юм.
Мянга мянган ижил нэхэмжлэл үргэлжилж байна
Reuters-ийн мэдээлснээр, одоогоор J&J-ийн эсрэг 67,000 гаруй шүүхийн хэрэг өрнөж байгаа бөгөөд эдгээрийн ихэнх нь өндгөвчний хорт хавдартай холбоотой байна. Мезотелиомын (уушгины бүрхүүлд үүсдэг ховор хавдар) тохиолдлууд харьцангуй цөөн байгаа аж.
