Азийн 3х3 сагсан бөмбөгийн аварга шалгаруулах тэмцээн энэ сарын 26-нд Сингапурт эхэлнэ. Уг тэмцээн 3х3 сагсан бөмбөгийн шинэ улирлыг нээж буйгаараа онцлог. Үүнтэй холбогдуулан Монголын эрэгтэй, эмэгтэй шигшээ баг хамтарсан бэлтгэлд гараад байна.
Монголын багуудын сугалааны үр дүн
Монголын эрэгтэй шигшээ баг А хэсгийг тэргүүлж, тэмцээнийг зохион байгуулагч Сингапурын багтай тоглох эрхтэй болов. Гурав дахь баг нь урьдчилсан шатнаас шалгарах бөгөөд Малайз, Индонез, Хонконг, Хятад, Бахрейн, Гуамын багууд өрсөлдөж байна.
Монголын эмэгтэй шигшээ баг Б хэсэгт багтаж, Тайландын багтай нэг хэсэг болов. Харин Тайвань, Энэтхэг, Хонконг, Гуамын багуудаас нэг нь урьдчилсан шатнаас шалгарч, уг хэсгийг бүрдүүлэх юм.
Монголын шигшээ багийн бүрэлдэхүүн
🔹 Эрэгтэй баг: Д. Дэлгэрням, Э. Дөлгөөн, А. Ананд, О. Энхбаатар, Ц. Отгонжаргал, Г. Цэлмэг, Г. Дөлгөөн
🔹 Эмэгтэй баг: О. Хулан, М. Булбул, У. Индра, Б. Ариунцэцэг, М. Цэрэнлхам, Ц. Болорцэцэг
Өнгөрсөн жилийн Азийн аварга шалгаруулах тэмцээнд Монголын шигшээ багууд хүрэл медаль хүртэж байсан. Олимпын жил тохиож буй тул эрэгтэй баг залуу тоглогчдоор багаа шинэчилсэн бол, 2023 оны Азийн аварга баг энэ жил дахин өрсөлдөхөөр бэлдэж байна. Шигшээ багийн ахлах дасгалжуулагчаар Стив Сэр ажиллах юм.
