Үндэсний их баяр наадмаас өмнө Монгол Улсын Засгийн газар 100 хоногт багтаан хэрэгжүүлэх ажлын төлөвлөгөөний төслийг хэлэлцэж, хэд хэдэн чухал чиглэлийг албан даалгаварт тусгасан байна. Эдгээр арга хэмжээнүүд нь төрийн бүтцийн давхардлыг цэгцлэхээс эхлээд авлигын эсрэг үйл ажиллагааг эрчимжүүлэх хүртэл өргөн хүрээг хамарчээ.
Засгийн газрын 100 хоногт хийхээр төлөвлөсөн гол ажлууд:
- Бүх түвшинд чиг үүргийн давхардлыг арилгаж, төрийн байгууллагын бүтцийг цомхон болгох;
- Стратегийн орд эзэмшигч компанитай хувь эзэмшлийн асуудлаар хэлэлцээ хийх;
- Малчид болон жижиг, дунд үйлдвэрлэгчдийн хамтын ажиллагааг дэмжих дундын хоршоо байгуулах;
- Авлигын томоохон хэргүүдийн шийдвэрлэлтийг хурдасгах.
Эдгээр ажлын хүрээнд иргэдийн оролцоог нэмэгдүүлэх зорилгоор E-Mongolia платформоор санал асуулга явуулсан бөгөөд долдугаар сарын 15-ныг хүртэл санал авч, наадмын дараа нэгтгэн танилцуулахаар төлөвлөсөн. Үүнээс харахад наймдугаар сараас хэрэгжих төлөвлөгөө арваннэгдүгээр сарын дунд хүртэл үргэлжлэх болно.
Төр, засгийн нөхцөл байдал ба улс төрийн хүлээлт
Л.Оюун-Эрдэнийн Засгийн газрын огцрох эсэх асуудалтай зэрэгцэн улс төр тодорхой бус байдалд орсон нь УИХ-ын чуулганы ирц буурах, хууль хэлэлцэлт зогсонги болох зэрэгт нөлөөлсөн. Харин Ерөнхий сайд Г.Занданшатар томилогдсоноор шинэ Засгийн газар “оройтож” гарч ирсэн ч шийдэмгий ажиллах шинжтэй байгааг ажиглагчид онцолж байна. УИХ-ын хаврын чуулган хаагдсан ч ЗГ-ын ажил амралтгүй үргэлжлэх хэрэгтэй хэвээр байна.
Төвлөрөл шаардсан үндсэн дөрвөн асуудал
1. “Оюу толгой” болон “Онтрэ ресурс”-ын асуудал
- Лиценз шилжүүлэлтийн процесс зогсонги байдалд орсон.
- Далд уурхайн бүтээн байгуулалт хойшилсон.
- О.Батнайрамдал гишүүнээс бусад нь энэ сэдвийг идэвхтэй хөндөөгүй.
- Занданшатарын ЗГ хэрхэн Рио Тинто болон Онтрэ-тэй ажиллах нь тодорхойгүй хэвээр.
2. Алтны үнийн өсөлт ба “Алт-3” аян
- Өмнөх ЗГ-ын санаачилсан “Алт-3” аян хэлэлцэгдэхгүй байна.
- АҮЭБ-ын сайд Г.Дамдинням тогтоолын төсөлд анхаарч байсан ч хаврын чуулганаар батлагдаагүй.
- Алтны үндсэн ордуудыг эргэлтэд оруулах, хөнгөлөлттэй зээл олгох зэрэг заалт тусгасан байсан.
3. Эдийн засгийн хүндрэл, инфляц ба төсвийн тодотгол
- Нүүрсний үнэ унасаар байгаа нь төсвийн орлогыг таслах эрсдэлтэй.
- Инфляц өндөр хэвээр байгаагаас иргэдийн бодит орлого буурч эхэлсэн.
- Сангийн яам болон Монголбанк эдийн засгийн бодлогоо уялдуулах шаардлагатай.
- Тэтгэврийн зээлийн дарамт, иргэдийн амьжиргаа улам хүндэрч байна.
4. Өвлийн бэлтгэл ба эрчим хүчний асуудал
- Шахмал түлшний оронд хагас коксжуулсан нүүрс ашиглах шийдэл хүлээлттэй байна.
- Сайжруулсан түлшний үйлдвэр одоогоор байхгүй, шийдэл тодорхойгүй.
- Хийн халаалт нэвтрүүлэх анхны туршилт хийх шаардлагатай бүсүүд бий.
- ТЭЦ-3-ын хүчин чадал хүрэлцэхгүй байж болзошгүй, эрчим хүчний импорт яригдаж байна.
Намрын чуулган, хууль тогтоогчдын сорилт
УИХ-ын гишүүдийн шинэ санаачилгууд, ялангуяа залуу, шинэ мандаттай гишүүдийн ажил намрын чуулганаар үнэлэгдэнэ. Төр, засгийн гол институциуд болох Засгийн газар, Монголбанк, Нийслэл илүү идэвхтэй ажиллах шаардлагатайг нөхцөл байдал харуулж байна.
