Нийслэлийн авто замын түгжрэлийг бууруулах, зорчих хөдөлгөөний чадамжийг нэмэгдүүлэх зорилгоор Улаанбаатар хотод шинэ тойрог замуудын бүтээн байгуулалт шат дараатай хэрэгжиж эхэллээ.
Эхний тойрог замын ТЭЗҮ батлагдав
Зам тээврийн яамны харьяа Шинжлэх ухаан, технологийн зөвлөлөөс Улаанбаатар хотын анхны тойрог замын техник-эдийн засгийн үндэслэлийг (ТЭЗҮ) албан ёсоор баталлаа. Энэхүү судалгааг “Си Эс Си Айком консалтантс” компани боловсруулсан бөгөөд нийт хоёр шинэ тойрог зам байгуулах санал дэвшүүлсэн юм.
22-26 км урттай, зургаан эгнээтэй автозам
Батлагдсан эхний тойрог замын төсөл нь 22-26 км урттай, зургаан эгнээтэй өргөн трасс байх юм. Шинэ замыг ашиглалтад оруулснаар нийслэлийн авто замын түгжрэлийг 30 орчим хувиар бууруулах хүлээлттэй байна.
Өмнөхөөс илүү нарийвчилсан судалгаа
Тус төсөл нь өмнөх ижил төслүүдээс ялгаатай нь дараах нарийвчилсан судалгаан дээр суурилсан:
- Анхан шатны зураг төсөл, инженерийн шийдэл
- Инженер-геологийн иж бүрэн судалгаа
- Одоо ашиглагдаж буй замын байдалд дүн шинжилгээ
- Хотын ерөнхий төлөвлөгөөтэй уялдуулсан төлөвлөлт
- Байгаль орчны нөлөөллийн үнэлгээ
- Инженерийн дэд бүтцийн байршлын судалгаа
Шинэ тойрог замын төсөл хэрэгжсэнээр хотын автозамын бүтцэд стратегийн томоохон өөрчлөлт орж, төв замын ачаалал буурах, тээврийн урсгал эрчимжих суурь нөхцөл бүрдэх юм.
