2026 оны чөлөөт бөхийн Дэлхийн аварга шалгаруулах тэмцээн Казахстаны Астана хотод аравдугаар сарын 27-ноос арваннэгдүгээр сарын 1-ний хооронд үргэлжилж байна. Дэлхийн шилдэг бөхчүүд цугласан энэ удаагийн тэмцээнд Монгол Улсаас эрэгтэй, эмэгтэй тус бүр 10 тамирчин оролцож байгаа юм.
Тэмцээний эмэгтэйчүүдийн -50, -57, -65, -76 кг-ын жингийн урьдчилсан шатны барилдаануудын үеэр Монголын дэлхийн аваргын медальтай дөрвөн бөх дэвжээнд гарахаар байна.
Д.Отгонжаргал олимпын дараах анхны тэмцээндээ оролцоно
Эмэгтэйчүүдийн -50 кг-ын жинд ДАШТ-ий хоёр мөнгө, нэг хүрэл медальтай Гавьяат тамирчин Д.Отгонжаргал өрсөлдөнө.
Тэрээр “Парис-2024” олимпын наадмаас хойш анх удаа албан ёсны тэмцээнд барилдах гэж байгаа бөгөөд эхний тойрогт Мароккогийн Хажар Канебтай учраа таарчээ.
-57 кг-ын жинд ДАШТ-ий мөнгөн медальт Б.Хулан Бразилын Жуллиа Пеналбертэй барилдана. Энэ барилдааны ялагч шөвгийн 16-д БНХАУ-ын Хун Кэсиньтэй хүч үзэх юм.
Хун Кэсинь энэ оны Азийн аварга шалгаруулах тэмцээн болон Азийн наадамд дараалан түрүүлж, дэлхийн чансааг тэргүүлж байгаа бөгөөд 2026 онд одоогоор нэг ч ялагдаагүй амжилттай явж байна.
Т.Энхжин эхний тойрогт гоц мөргөв
-65 кг-ын жинд өнгөрсөн жилийн ДАШТ-ий хүрэл медальт, дэлхийн чансааны хоёрдугаарт эрэмбэлэгдэж буй Т.Энхжин эхний тойрогт гоц мөргөжээ.
Тэр шөвгийн 16-д Төв Африкийн Бүгд Найрамдах Улс болон Германы бөхийн аль ялсантай барилдана.
Харин -76 кг-ын жинд ДАШТ-ий мөнгөн медальт Э.Даваанасан ОХУ-ын Мария Силинатай эхний барилдаанаа хийхээр оноолт таарсан байна.
Ингэснээр Монголын эмэгтэй шигшээ багийн дэлхийн медальтай дөрвөн бөх дөрвөн өөр жинд өрсөлдөж, өмнөх амжилтаа ахиулахын төлөө Астанагийн дэвжээнд хүч үзэхээр боллоо.
